Wadadan oo uu dhagax dhigay Guddoomiyaha Gobalka Banaadir ahna Duqa Magaalada Muqdisho ayaa waxey dhax martaa Degmooyinka Cabdacaziis iyo Kaaran, sidoo kale waxey wadadan isku xirtaa Isbitaal Keysaney ilaa iyo Saldhigga Bari ee Degmada Cabdacaziis.
Maamulka Gobalka Banaadir ayaa waddadan ugu tala galay in dib u dhis lagu sameeyo isla markaana laami la saaro, waxaana dhismaha waddadan ka mahad celiyay Guddoomiyaha Degmada cabdacaziis oo ku hadlaayay codka Maamulka labada Degmo ee Kaaran iyo Cabdacaziis.
“Maanta farxadeyda lama qayaasi karo sababtoo ah dhismaha waddadan waxaan ku taameynay halsano, hasa ahaate hadda ayaan ku geeleysanay inaan xilligeedi imaano waxaana u mahad celinayaa ganacsatada bulshada reer Kaaran iyo Cabdacaziis iyo maamulka Gobalka Banaadir”ayuu yiri Guddoomiyaha Degmada C/casiis.
Guddoomiye ku-xigeenka Siyaasadda iyo Amniga ee maamulka Gobalka Banaadir Maxamed Axmed Diiriye ayaa warbaahinta u sharxay dhismaha waddadani.
“Waddadan qorshaheeda muddo ayey soo socotay, hasa ahaate hadda ayaa lagu guulestay in uu Duqa Magaalada dhagax-dhigo waddadan waxey isku xirta Saldhiga bari ee Degmada Cabdaciiz iyo Isbitaal Keysaney” ayuu yiri Guddoomiye ku-xigeenka Siyaasada ee gobolka Benaadir.
Xildhibaan Yuusuf Ibraahim Afrax oo kamid ah mudanayaasha golaha Shacabka ayaa tilmaamay in dhismaha waddooyinka ay ahmiyad gaar ah u leedahay bilicda iyo horumarka Caasimadda.
Gudoomiyaha Gobalka Banaadir ahna duqa Magaalada Muqdisho Mudane Yuusuf Xuseen Jimcaale (Madaale) oo goobta dhagax dhiga ka hadlay waxa uu sheegay in sanadkan 2017 uu maamulka Gobalka dhisi doono qaar badan oo kamid ah wadooyinka caasimadda ku yaala, si loo soo celiyo bilicdii ay magaaladu lahayd.
Nuur Saciid Tahliil
