Wafdi ka socda hay’adda UNICEF ayaa maanta booqasho ku tegay xarunta dhexe ee Wasaaradda caafimaadka Puntland, waxaana xafiiskiisa ku qaabilay Agaasimaha Guud ee Wasaaardda Dr Cabdirisaaq Xirsi Xasan oo ay wehlinayeen Agaasimayaasha Wasaaradda, lataliyaal iyo qaar ka mid ah shaqaalaha Wasaaradda gaar ahaan qaybta tallaalada.
Agaasimaha ayaa wafdiga si diiran ugu soo dhaweeyay xarunta Wasaaradda lana wadaagay xaaladihii ugu danbeeyay ee xanunka COVID-19 dadaallada Wasaaraddu wado iyo talaalka oo dadka si weyn loo gaarsiiyay.
Waxaa sidoo kale uu uga mahadceliyay hay’adda UNICEF wada shaqaynta wanaagsan ee kala dhaxaysa Wasaaradda iyo kaalinta wax ku ool ah ee ay uga jirto dadaalka Wasaaraddu ka wado ka hortagga COVID-19.
Wafdiga oo ka koobnaa Boney Kyandindi, Madaxa Caafimaadka UNICEF ee Soomaaliya iyo Daniel Yayemain, Madaxa Tallaalada UNICEF Puntland waxana ku wehelinayay Cabdirisaaq Haga, Sarakaal Ka tirsan qaybta tallaalada UNICEF Puntland Iyo Maxamed Hiirad, Sarkaal ka tirsan wacyi gelinta tallalada UNICEF ee Puntland.
Saraakiisha ka socotay hay’adda ayaa dhankooda uga mahadceliyay mas’uuliyiinta Wasaaradda soo dhawayntooda iyo dadaalka ay ugu jiraan yaraynta saamaynta xanuunka uu yeelan karo iyo gaaritaanka dadweynaha ee tallaalka COVID-19.
Intaas kadib waftiga ayaa kormeeray qaybaha keydka dawooyinka Wasaaradda iyo qaboojiyaasha tallaalka lagu hayo, waxayna warbixinno ka dhagaysteen saraakiisha ka shaqaysa Waaxda.
