Ra’iisul Wasaaraha Xukuumadda Federaalka Soomaaliya Mudane Xasan Cali Kheyre iyo wafdi uu hogaa,inayo ayaa goor dhaw gaaray magaalada Caabudwaaq ee Gobolka Galgaduud.
Wafdiga uu hogaaminayo Ra’iisul Wasaaraha Dalka waxaa Caabudwaaq ku soo dhaweeyay mas’uuliyiin ka tirsan dowladda Federaalka ah ee Soomaaliya, xubno ka socday Dowlad Goboleedka Galmudug iyo dadweyne aad u fara badan, kuwaasi oo sitay caleemo qoyan iyo sawirada Ra’iisul Wasaaraha.
Ra’iisul Wasaaraha Xukuumadda Soomaaliya Mudane Xasan Cali Kheyre oo khudbad u jeediyay mas’uuliyiinta iyo dadweynihii ku soo dhaweeyay garoonka diyaaradaha Caabudwaaq ayaa ugu horeyn uga mahadceliyay sida diiran ay u soo dhaweeyeen isaga iyo wafdiga la socda.
Ra’iisul Wasaaraha ayaa xusay in dowladda Soomaaliya ay ka go’antahay in dib u heshiisiin dhab ah la dhex dhigo bulshada wad degta deegaannada Galmudug.
Wafdiga Ra’iisul Wasaaraha ayaa caawa lagu wadaa inay kulamo la qaataan qeybaha bulshada ee ku dhan Caabudwaaq.
Mudane Xasan Cali Kheyre oo socdaal dhulka ah ku maraya qaar ka mid ah magaalooyinka Gobolka Galgaduud ayaa horey u tegay magaalooyinka Dhuusamareeb iyo Cadaado ee Gobolka Galgaduud, iyadoo la qorsheynayo in uu tego magaalooyin kale.
Shalay ayay ahayd markii wafdi uu hogaaminayo Wasiir ku-xigeenka Batroolka ay gaareen magaalada Caabudwaaq, kuwaasi oo hore dhac u ah Wafdiga Ra’iisul Wasaaraha.
