Waxaa garoonka Aadan Cadde ee magaalada Muqdisho soo gaaray diyaarad Militeri oo ka socotay Dalka Qatar oo qaaday dhaawacyada halista ah ee ku waxyeeloobay xasuuqii 28-ka December ka dhacay Isgoyska Ex-koontarool Afgooye ee magaalada Muqdisho.
Danjiraha Soomaaliya ee Dalka Qatar Danjira Cabdirisaaq Faarax Taano oo la hadlay Radio Muqdisho ayaa sheegay in diyaaradda ka timid dalka Qatar ay la socdeen 18 qof oo isugu jira Dhaqaatiir iyo Kalkaaliyeyaal caafimaad.
“Waxaan la socdaa diyaarad ciidan oo Ambulance ah oo ay ku dhantahay qalabka gargaarka deg degga ah oo ay soo dirtay dawladda Qatar, ayna kaga qayb-qaadanayso dawaynta dhaawacyada qarixii lagu hoobtay ee ka dhacay Ex-koontrol Afgooye laba bari kahor., dhaawacyada waxa ay heli doonaan daryeel caafimaad” ayuu yiri Danjiraha.
Safiirka Soomaaliya ee Dalka Qatar Danjira Cabdirisaaq Faarax Taano ayaa xusay in diyaaraddu ay la socdaan dhaqaatiir caafimaad iyo howlwadeenno kale, kuwaasi oo baxnaanin doono dhaawacyada inta ay hawada ku sii jiraan.
“Diyaaradda waxaa nala socda 18 qof oo isugu jirta dhaqaatiir iyo kalkaaliyeyaal caafimaad si ay u caawiyaan dhaawacyada la qaadayo oo tiradoodu gaareyso 23 qof, waxaana la socda 23 kale oo ka mid ah ehelada dhaawacyada si ay u caawiyaan, halkii qof oo dhaawac ah waxaa la socda qof caawinaya” ayuu yiri Danjire Cabdirisaaq Faarax Taano
Danjire Cabdirisaaq Faarax Taano ayaa hoosta ka xariiqay in dhaawacyada la geyn doono isbitaalka ugu weyn uguna caansan Hamad Hospital ee ku yaala magaalada Doxa ee caasimadda Dalka Qatar.
Diyaaraddan ayaa noqoneysa tii labaad oo gargaar sida oo Muqdisho soo gaarta, waxaana dowladaha Qatar iyo Turkiga ay ka soo jawaabeen baaqii degdega ahaa ee ka yimid dowladda Federaalka.
Maalintii shalay ayay aheyd markii sidan oo kale diyaarad milateri oo kuwa caafimaadka oo dowladda Turkiga soo dirtay ay magaalada Muqdisho ka qaaday dhaawacyada illaa 16 ruux, oo mid ka mid ah markii la geeyay magaalada Ankara geeriyooday.
