Wasiirka Wasaaradda Arrimaha Dibadda iyo Iskaashiga Caalamiga, Mudane Danjire Axmed Ciise Cawad, Wasiiru dowlaha Mudane Cabdulqaadir Axmed-kheyr Cabdi , Xoghayaha joogtada Wasaaradda Mudane Danjire Maxamed Cali-Nuur Xaaji, Agaasimayaasha Waaxyaha, Safiirrada, Qunsulada Guud , Lataliyeyaasha Wasaaradda iyo dhammaan Saraakiisha Wasaaradda Arrimaha Dibadda iyo Iskaashiga Caalamiga waxa ay tacsi u dirayaan ehellada, asxaabta iyo ummadda Soomaaliyeed geerida ku timid Allah u naxariistee Cusmaan Cumar Cabdullaahi oo ahaa Xoghayaha labaad ee Safaaradda Jamhuuriyadda Federaalka Soomaaliya ee Liibiya oo habeennimadii Khamiista, 16 April, 2020 ku geeriyooday magaalada Muqdisho ee Caasimadda Soomaaliya.
Marxuum Cusmaan Cumar Cabdullaahi oo ku dhashay sanadkii 1958 degmada Buulo burte ee Gobolka Hiiraan ayaa waxa uu Wasaaradda Arrimaha Dibadda iyo Iskaashiga Caalamiga ku soo biiray sanadkii 2016, iyadoo isla sanadkaasi loo magacaabay xilka Xoghayaha labaad ee Safaaradda Soomaaliya ee Liibiya , kahor inta aan Wasaaradda Arrimaha Dibadda loo soo wareejin waxa uu ahaa Maareeye kuxigeenka labaad ee Wakaaladda Howlaha Maraakiibta iyo Gaadiidka Badda ee Wasaaradda Howlaha Guud, Gaadiidka Badda iyo Dekadaha oo loo diiwaangeliyay shaqaale ahaan sanadkii 2013.
Diblomaasi Marxuum Cusmaan Cumar Cabdullaahi oo ka qalinjebiyay Kulliyadda Juquraafiga iyo Taariikhda ee Jaamacadda Ummadda Soomaaliyeed sanadkii 1984 ayaa bare ka kala noqday dugsiyo hoose, dhexe iyo sare oo ku kala yaalla Soomaaliya iyo Yemen.
Marxuum Cusmaan Cumar waxa uu kala shaqeeyay Danjire Muxiyaddiin Maxamed Kaalmooy howsha lagu soo siideynayay dad badan oo Soomaali ah oo xabsiyo ku yaalla gudaha Liibiya ku xirnaa muddo dheer.
Haddaba, annagoo ka murugeysan, kana tiiraanyeysan geerida Marxuumka, ayaa waxaan Allah uga baryeynaa inuu u naxariisto, qabrigiisana nuur iyo neecaaw udgoon ku siiyo, hoygiisana ka dhigo Jannada sare ee Alfardows, qoyskiisa, ehelladiisa iyo asxaabtiisana samir iyo iimaan ka siiyo – Aamiin.
INNAA LILLAAH WA INNAA ILEYHI RAAJICUUN
