– Wasiirka Wasaaradda Arrimaha Dibadda iyo Iskaashiga Caalamiga ee Jamhuuriyadda Federaalka Soomaaliya Mudane Danjire Axmed Ciise Cawad ,Wasiiru dowlaha Mudane Cabdulqaadir Axmed-Kheyr Cabdi , Xoghayaha joogtada Wasaaradda Mudane, Siciid Xaaji Maxamuud, Agaasimayaasha Waaxyaha, Safiirada, Qunsulada guud , Lataliyeyaasha Wasaaradda iyo dhammaan Saraakiisha Wasaaradda Arrimaha Dibadda iyo Iskaashiga Caalamiga waxa ay tacsi u dirayaan ehellada, asxaabta iyo Ummadda Soomaaliyeed geerida ku timid Allah u naxariistee Danjire Ali Omar Sheegow oo May 02, 2019 ku geeriyooday Magaalada Manchester ee Boqortooyada Midowday (UK).
Marxuum danjire Ali Omar Sheegow oo muddo dheer ku soo jiray howlaha diblomaasiyadda , ayaa ahaa xeeldheere howshii loo xil saaray u gutay si qarannimo leh.
Marxuum Danjire Cali Sheegow oo muddo dheer dibad-joog ka ahaa dalka ayaa noqday Safiirkii ugu horreeyay ee Soomaaliya ee furay Safaarada Belgium, waxa uu ka tagay raad taariikheed dhaxal u ah jiilka diblomaasiyadda.
Haddaba, annagoo ka murugeysan , kana tiiraanyeysan geerida Marxuumka , ayaa waxa aan Allah uga baryeynaa inuu u naxariisto, qabrigiisana nuur iyo neecaaw udgoon ku siiyo, hoygiisana ka dhigo Jannada sare ee Alfardows , qoyskiisa , ehelladiisa iyo asxaabtiisana samir iyo iimaan ka siiyo – Aamiin.
INNAA LILLAAH WA INNAA ILEYHI RAAJICUUN
