Wasaaradda Beeraha dowlad goboleedka Galmudug oo kaashanaysa quburo ka socota Wasaaradda Beeraha Soomaaliya ayaa maalmihii la soo dhaafay deegaanno ka tirsan Galmudug waxa ay kula dagaalamayeen Ayaxa oo dhibaato ku haya, kaas oo aafeeyey inta badan dalagyada Beeraha.
Maxamed Daahir oo ka tirsan Wasaarada Beeraha ee Galmudug ayaa sheegay in meelo badan lagula dagaalamay cayayaanka Ayaxa balse ay habooneed in waqti hore lala dagaalamo, maadaama uu baabi’iyay Dhul-daaqsimeed badan.
Cumar Ilkacase oo ka mid ah Beeralayda Duleedka magaalada Dhusamareb oo maanta Ayaxa lagula dagaalamay Deegaankooda ayaa sheegay in dalagyo badan uu aafeeyey, isla markaana dhibaatada xoogan uu Ayaxu ku hayey bilihii la soo dhaafa.
Guddoomiyaha magalaada Dhusamareb Macalin Nuur Cilmi Cabdulle oo qayb ka ahaa mas’uuliyiinta ku sugnaa Goobaha Ayaxa lagula dagaalamayay ee duleedka Dhusamareb ayaa waxa uu xusay in la dagaallanka Ayaxu u baahan yahay mashruun aad u wayn, la iskana kaashado arintaan.
Ayaxa ayaa bilihii la soo dhaafay waxa uu dhibaato xoogan ku hayey beeralayda iyo xoola dhaqatada Gobolada Dhexe waxa ayna ula tacaalayeen siyaabo kala duwan, maadaama uu waxyeeleeyey beeraha iyo dhul-daaqsimeedka.
