Wasaaradda Beeraha iyo Waraabka Xukuumadda Federaalka Soomaaliya ayaa maanta soo xirtay Tababar socday laba maalin oo ku saabsan uruurinta Xogaha Suuqa, si loola socdo sicirka cuntada iyo badeecadaha daruuriga ah.
Tababarka ayaa wuxuu u dhacay si wanaagsan, waxaana soo xiray Cabdinasir Cumar Cismaan oo ah Agaasimaha Xiriirka Bulshada iyo Wacyigelinta ee Wasaaradda Beeraha iyo Waraabka, wuxuuna ka dhawaajiyay inuu tababarku ahaa mid muhiim ah, maadaama lagu ogaanayo xogaha suuqa, ayadoo lala soconayo sicirka cuntada iyo badeecadaha kale duwan ee dalka. Waxaa sidoo kale uu ka dhawaajiyay inay ka qeyb galayaasha tababarka ka faa’ideysteen ayna ku shaqeyn doonaan ayagoo si wanaagsan u ogaan doono xogaha suuqyada kale duwan ee dalka Soomaaliya.
Tababarka ayaa waxaa bixinayay khubaro aqoon fog u leh qaabka ugu wanaagsan ee loo ogaani karo xogaha suuqa, waxayna kale ahaayeen Maxamuud Ciise Faarax oo ah Agaasimaha Sugnaanta Cuntada ee Wasaaradda Beeraha iyo Waraabka Xukuumadda Federaalka Soomaaliya, Cabdullaahi Maxamed Axmed oo ah khabiir ka tirsan Wasaaradda Beeraha iyo Waraabka, Maxamed Cabdullaahi Xuseen iyo Maxamed Saciid Xasan oo ayagane u leh aqoon wanaagsan tababarka ay bixinayeen.
