Wasaaradda Caafimaadka iyo daryeelka Bulshada ee Dowlad Goboleedka Galmudug oo baryahaan dambe ku howlaneyd sidii dib loogu howl-gelin lahaa Isbitaalka deegaanka Dhabad oo u xirnaa labadii sano ee la soo dhaafay sababo la xiriira dhaqaale la’aan ayaa maanta la gaarsiiyay qalab loogu talagalay in loogu adeego bulshada deegaanka.
Guddoomiyaha deegaanka Dhabad iyo Odayasha dhaqanka ayaa Wasaaradda Caafimaadka Galmudug uga mahadceliyay dadaalkooda ku aadna dib u howlgelinta isbitaalka.
Dhinaca Kale Ugaas Maxamed Ugaas Axmed ayaa Dhabad gaarsiiyay mashiino tayo sare leh oo ah kuwa neefsiiya dadka qabo COVID-19.
Xildhibaan Cabdirixiin Cigaal oo ka tirsan Baarlamaanka Galmudug iyo Ugaas Maxamed Ugaas Axmed ayaa Wasaaradda ku amaanay qorshaha horumarinta daryeelka bulshada.
Wasiirka Caafimaadka Dowlad Goboleedka Galmudug Cabdiweli Cabdullaahi Jamac ayaa sheegay in Wasaaradda Caafimaadka oo taageero ka heleysa hay’adda Care international in bishaan dib-u-hawlgalin doonto Isbataalka guud ee deegaanka Dhabad.
