Wasaaradda Caafimaadka ee Xukuumadda Federaalka Soomaaliya ayaa deeq daawo ah gaarsiisay xarun Caafimaad oo ku taalla Deegaanka Golaleey ee degmada Balcad, halkaas oo la dhigay dad uu soo ritay cudurka shuban biyoodka.
Xildhibaan Cumar Maxamed Maxamuud oo ka mid ah mudanayaasha Baarlamaanka Soomaaliya ayay Wasaaradda caafimaadka u soo wakiilatay in deeqdan uu gaarsiiyo deegaankaasi, taasi oo loogu talagalay in lagu daweeyo dad uu soo ritay cudurka Shuban biyoodka oo la soo gaarsiiyay Isbitaalka Tuulada Golaleey oo ka mid ah tuulooyinka hoos yimaada Degmada Balcad ee Gobalka Shabeellaha Dhexe, wuxuuna Xildhibaanka ku wareejiyay Maamulka Isbitaalka.
Dr Mahad Cumar Abuukar oo ah Madaxa Isbitaalka Golaley oo deeqda dawada ah la gaarsiiyay ayaa ugu mahad celiyay Wasaaradda Caafimaadka sida ay ugu fidisay Gurmadka degdega ah, waxaana uu balan qaaday in ay ugu adeegayaan bulshada.
Xildhibaan Cumar Maxamed Maxamuud “Cumar Finish” ayaa ugu horeyn Wasaaradda caafimaadka uga mahadceliyay sida ay ugu gurmaneyso bulshada Soomaaliyeed, isagoo maamulka isbitaalka ka dalbaday inay wax ugu qabtaan bukaanada isbitaalka ku jira.
“Waxaan halkan ugu mahadcelinayaa Wasaaradda Caafimaadka oo ka soo baxday doorka ay ku laheyd u gar gaarida bulshada, waxaana leeyahay Maamulka Isbitaalka dadaala idinkana marka bulshadaan masiibooyin rabaani ah ayaa horay kudhacay, kanina waa mid kale oo halistiisa leh ee u gurmada dadka uu cudurka shubanka soo ritay”.ayuu yiri Xildhibaanka.
8-dii bishaan ayey aheyd markii uu cudurka shubanka uu ka dilaacay Tuulada Golaleey kaasi oo soo ritay 58 ruux oo sagaal ka mid ah ay u geeriyoodeen, halka kuwa qaar ay iminka xaaladooda caafimaad soo hagaageyso.
Dhanka Kale waxaa deeq tan la mid ah oo ka timid ururka Yole iyo Maamulka Degmada Balcad la gaarsiiyay isbitaalka Golaleey, iyadoo Gudoomiyaha Degmada Balcad ee Gobalka Shabeellaha Dhexe Maxamuud Maxamed Maxamuud Saneey uu dawada ku wareejiyay Maamulka Isbitaalka
Gudoomiyaha Ururka Yole Awees Axmed Caddoow ayaa sheegay in dadkan ay ka mudnaayeen in ka badan inta ay hada lasoo gaareen Balse Daruuftu ay keentay, isagoo xusay in tani ay u sii noqoneyso kaalmo bilow ah.
Guddoomiyaha Degmada Balcad Maxamuud Maxamed Maxamuud Saney ayaa Sheegay in ay siweyn ugu mahad celinayaa dhallinyarada ururka Yole oo deeqdan ay katimid, isagoo intaa ku daray in kan maamul ahaan ay mar waliba ka warqbai doonaan xaaladaha bukaanada ku jira isbitaalka.
