Wasaaradda caafimaadka ee Xukuumadda Federaalka Soomaaliya ayaa deeq dawo ah ku wareejisay mas’uuliyiin ka tirsan maamulka Koonfurgalbeed Soomaaliya, taas oo qeyb ka ah qorshaha kor u qaadista adeega caafimaad ee shacabka deegaannada maamulkaasi ku dhaqan.
Deeqda dawo ah oo gaaraysa ilaa iyo saddex gaari oo nuuca xamuulka qaada ah ayaa loogu talagalay in wax loogu qabto bulshada ku dhaqan deegaannada Maamulka Koonfurgalbeed oo ay ka jirto xaalado caafimaad darro ah.
Wasiirka Qorsheynta iyo Iskaashiga caalamiga ah ee maamulka Koonfurgalbeed Soomaaliya Mudane Cabdinaasir Cabdi Caruush oo deeqda dawada ah lagu wareejiyay ayaa Wasaaradda caafimaadka uga mahadceliyay sida ay kaalmadan dawada ah u soo gaarsiiyeen, isagoo balan qaaday in dawadan ay gaarsiin doonaan meelaha ugu haboon.
Wasiir ku xigeenka Wasaaradda Caafimaadka ee Xukuumadda Soomaaliya Mudane Cismaan Maxamed Cabdi “Cismaan Daalo” ayaa xusay in dawadan ay Wasaaraddu ku wareejisay Maamulka Koonfurgalbeed ay tahay mid ugu talagaleen in wax loogu qabto bulshada deegaannada maamulkaasi ku dhaqan, waxaana uu intaa ku daray in deeqdan ay Wasaaradda ka heshay boqortooyada Sacuudiga.
“Deeqdan dawada ah waxaan ugu talagalnay in wax looga qabto baahiyaha caafimaad ee ka jirta deegaannada Maamulka Koonfurgalbeed, runtii Wasaaradda Caafimaadku waxaa ka go’an in dawooyin ay gaarsiiso Maamul goboleedyada dalka ka jira iyo gobolada kale ee aan wali laga hirgelinin nidaamka federaalka ah” ayuu yiri Wasiir ku-xigeenka Caafimaadka.
