Wasaaradda Caafimaadka Xukuumadda Federaalka Soomaaliya ayaa Kulan soo dhaweyn ah u sameysay Howl-wadeenno cusub oo ku guuleystay ka mid noqoshada Mashruuca Damal Caafimaad oo loogu talo galay in sare loogu qaado Adeegga caafimaad ee Bulshada
Agaasimaha Guud iyo Agaasime Waaxeedyada Wasaaradda Caafimaadka Soomaaliya iyo marti sharaf kale ayaa ka qeyb galay kulankan oo u jeedkiisu ahaa soo dhaweynta Howlwadeenadan cusub oo ku guuleystay imtixaan furan oo ay u galeen ka mid noqoshada Mashruuca Damal Caafimaad oo ah barnaamij loogu talo galay in sare loogu qaado adeega Caafimaad ee bulshada, gaar ahaan daryeelka Hooyada iyo Dhallaanka iyo ka hortagga cudurada faafa iyo in Wasaaraddu awood u yeelato fulinta mashaariicda.
Mashruuca Damal Caafimaad oo muddo Afar sanno ah socon doona ayaa waxaa ku bixi doonta lacag boqol Milyan oo doolar ah, waxaana laga fulin doona shan Gobol sida uu sharxay Xiriiriyaha Mashruuca Damal Caafimaad Nuur Cali Maxamuud.
Agaasimaha Waaxda Shaqada iyo Shaqaalaha ee Wasaaradda Caafimaadka Maxamuud Xuseen Calasow ayaa inta uu kulanka socday Howlwadeenada cusub la wadaagay qaab howleedka iyo hadafyada Wasaaradda Caafimaadka, wuxuuna xusay inay gacmo furan ku soo dhaweenayaan shaaqlaha cusub ee Wasaaradda kusoo biiray.
Ugu dambey Agaasimaha Guud ee Wasaaradda Caafimaadka Soomaaliya Dr Cabdinaasir Muqtaar Ibraahim oo kulanka soo xiray ayaa xusay inuu ku raja weynayahay In howlwadeennada cusub ee nasiibka u yeeshay inay ka mid noqdaan Mashruuca Damal Caafimaad ay wax badan kusoo kordhin doonaan Adeegga Caafimaad ee dalka, isla markaana ay waajibaadkooda shaqo u gudan doonaan si hufan sii loogu guuleyto hadafka loogu talogalay Mashruuca Damal Caafimaad oo ay ugu horeyso daryeelka Hooyada iyo Dhallaanka.
