Wasaaradda Dekadaha iyo Kalluumeysiga badda ee Galmudug ayaa ganacsatada u raran doonyaha yar yar ugu baaqday inay ka faa’iideystaan dekadda Kalluumeysiga oo ay ka hirgelinayaan dhanka dekadda weyn ee Hobyo, taasi oo qeyb ka ah qorshaha lagu doonayo in ganacsatada ay halkaasi kala soo degi karaan alaabaha yar yar.
Agaasimaha Guud ee Wasaaradda Dekedaha iyo Kalluumeysiga badda ee Galmudug mudane Cabdirashiid Maxamed ayaa Radio Muqdisho uga waramey dekad kalluumeysi oo howsheeda ay socoto si gnacasatada deegaanka ay uga faa’iideystaan, isagoo xusay in dekadda dekadda dhismaheeda uu meel gabo gabo ah maraya, ayna ugu talagaleen in ay ka faa’iideystaan kalluumeysatada deegaannada Galmudug iyo ganacsatada doonyaha yar yar alaabaha ku keensada.
“Dekad Kalluumeysi ayaan ka barbar sameynaynaa Dekadda weyn ee Hobyo, taasi oo aan ugu talagalnay in ay ka faa’iideystaan kalluumeysatada, waxaana kaloo laga soo dejin karaa cuntooyinka oo ay isticmaali karaan doonyaha yar yar ee u raran hay’adda Barnaamijka cunnada Adduunka ee WFP” ayuu yiri Agaasimaha Guud.
Mudane Cabdirashiid Maxamed ayaa sheegay in ujeedka dhismaha dekaddan yar ee Kalluumeysiga ku saabsan ay noqoneyso goob laga ilaaliyo ammaanka dekadda weyn ee Hobyo, si halkaasi ay fariisin ugu noqoto ciidamada ilaalada xeebaha.
