Kulankan wadatashiga ah ee siyaasadda Dhallinyarada Qaranka ayaa Wasaaradda Dhallinyarada Soomaaliya ku casuuntay 40 urur dhallinyaro oo gobolka Benaadir ka dhisan, kuwaas oo muddo labo maalin ah ka doodi doona aragtidooda ku aadan siyaasadda Dhalinyarada Qaranka oo Wasaaradda dhallinyarada iyo ciyaaraha ku howlan tahay dejintiisa.
Wasiir ku xigeenka Wasaaradda Dhallinyarada iyo ciyaaraha Axmed Cumar Islow ayaa ka hadlay ahmiyadda ay leedahay siyaasadda dhallinyarada Qaranka, isagoo xusay inay xoogga saari doonaan aragtida dhallinyarada Soomaaliyeed.
Khadiijo Maxamed Diiriye, Wasiirka Dhallinyarada iyo Cayaaraha ee Xukuumadda Soomaaliya oo ka qeyb galayaasha kulanka wadatashiga la hadlaysay ayaa guud martay dhibaatooyinka kala duwan ee heysta dhallinyarada Soomaaliyeed, waxayna balan qaaday in ay ku dari doonaan siyaasadan aragtida dhallinyarada soo gudbiyaan.
Dhanka kale, Wasiirka Dhallinyarada iyo Cayaaraha ee Xukuumadda Soomaaliya Khadiijo Maxamed Diiriye, ayaa tacsi u dirtay ehelada iyo bahda cayaaraha Soomaaliya, Marxuum Daahir Maxamed Mukhtaar (Daahir B4) oo kamid ahaa Cayaartoydii Xulka Qaranka oo shalay ku geeriyooday qaraxii ka dhacay Muqdisho.
