Wasaaradda Gaadiidka iyo duulista hawada ee Xukuumada Soomaaliya ayaa soo saartay amarro ku socda dadka Gaadiidka kala iibsada oo lagu amray in warqadaha cadaymaha ah ee gaadiidka lagu kala iibsaday la geeyo xarunta Wasaarada, si loo diiwaan geliyo.
Agaasimaha Guud ee Wasaaradda Gaadiidka Cali Gacal Gaabow oo la hadlay Radio Muqdisho ayaa sheegay in ay soo saareen amar ku saabsan in dadka gaadiidka kala iibsanaya ay warqadda caddeynta ah la yimaadaan xarunta Wasaaradda, si haddii baabuurka lagu geysto fal dambiyeed aysan saameyn ku yeelan qofkii laga iibsaday.
“Dadka baabuurka waa ay gadanayaan, mana u diiwaan gashana, gaadiidka ay iibsadeen, dhibaatooyin badan ayaana lagu qabaa, marka dadka gaadiidka kala iibsanaya waxaan farayaa in warqadda kala wareejinta ay la yimaadaan Waaxda Gaadiidka ee BRA, si loo caddeeyo milkiyadda qofka sida rasmi ah ula wareegtay baabuurka” ayuu yiri Agaasimaha Guud ee Wasaaradda Gaadiidka.
Wasaaradda Gaadiidka ayaa ku howlan sidii ay qorshe ugu sameyn lahayd dadka gaadiidka kala iibsanaya, si loo xaliyo muranka ka dhasha gaadiidka lakala iibsanaya.
