Agaasimaha guud ee Wasaaradda Ganacsiga iyo Warshadaha Xukuumadda Federaalka Soomaaliya Mudane. Cabdicasiis Ibraahim Aadan, ayaa hay’adda Qaramada Midoobay u qaabilsan horumarinta Warshadaha ee UNIDO, ka guddoomay afar kun oo xabbo oo Af-saab ah (Facemask) oo loogu talo-galay in ay isticmaalaan shaqaalaha Wasaaradda si loogga hor-tago faafitaanka cudurka COVID-19.
Af-saab-yadan (Facemask), ayaa ah kuwo lagu farsameeyey waddanka gudahiisa, waxaana lagu fududeeyey barnaamijka horumarinta Ganacsatada ee bartamaha iyo koonfurta Soomaaliya ee EDU’s oo tobabaro, la-talin iyo suuq-abuur looggu sameeyo ganacsatada Soomaaliyeed, kaasi oo ay maal-galisay hay’adda dhinaca Iskaashiga u qaabilsan Talyaaniga.
Barnaamijkan, ayaa ujeedkiisu yahay siddii loo dhiiri-gelin lahaa Warshadeynta dalka iyo kor-u-qaadista wax-soo-saarka si loogga maarmo in dalka dibaddiisa wax laga soo dhoofsado.
Agaasimaha Guud ee Wasaaradda Ganacsiga Mudame Cabdicasiis Ibraahim Aadan oo agabkan ku guddoomay xafiiskiisa, ayaa hay’adda UNIDO iyo hay’adda Iskaashiga u qaabilsan Talyaaniga uga mahadceliyey inay deeqdan soo gaarsiiyeen wakhti ku munaasib ah oo baahi badan loo qabay, waxaana uu ku boggaadiyey wada-shaqeynta dhow ee ay la lee yihiin Wasaaradda iyo weliba sidoo kale taageeradooda dalka.
