Munaasabada daahfurka ololaha 16ka maalmood ee wacyi galinta ka hortaga tacadiyada loo geysto haweenka ayaa waxaa ka qeyb galay mas’uuliyiin Sarakiisha laamaha Amniga iyo Xubno ka socday bulshada qeybaheeda kala duwan.
Isku duwaha Wasaaradda haweenka iyo Xuquuqul Insaanka Galmudug ee Gobalka Mudug Drs Yurub Cabdul Qaadir Sheekh Cali ayaa ugu horreyn ka hadashay munaasabada,iyadoona sheegtay in sanadkaan 2021 in kabadan 50kiis oo la xariira tacadiyada haweenka ay diwaan galiyeen Gobalka Mudug kuwaas oo u badan kufsi loo geeystay Carruur iyo haween.
Guddoomiyaha Culumada Galmudug Sheekh Muxyadiin Yuusuf Barre iyo Taliye ku-xigeenka qeybta Booliska Gobalka Mudug Gaashaanlle Maxamed Mire Maxamuud ayaa fariin u diray odayaasha dhaqanka.Taas oo ku aadan in hay’addaha garsoorka iyo laamaha Amniga ay u madax bananeeyaan kiisaska la xariira kufsiga si sharciga loo marsiiyo cidda geysatay .
Munaasabadaan oo intii ay socatay ay ka hadleen xubnihii matalayay bulshada kuwaas oo xusay in loo baahan yahay in laga wada qeybta olalahaasi ayaa waxaa si rasmi ah u daahfuray guddoomiye ku xigeenka gobalka Mudug Mudan Axmed Maxamed Shire Qoodaar,waxaana uu sheegay in dhibka ugu badan ee soo celceliya tacadiyada haweenka iyo Carruurta ay masuuliyadooda leeyihiin Odayaasha dhaqanka balse looga baahan yahay in ay doorkooda ka qaataan sidii sharciga loo marsiin lahaa taasna ay tahay wadada kaliya ee loo mari karo joojinta tacadiyada iyo haweenka iyo Carruurta. 
