Wasaaradda Haweenka iyo Xuquuqda Aadanaha Galmudug ayaa magaalada Dhuusamareeb ka daah furtay shir la isugu keenay Haweenka Caasimadda iyo kuwo ka yimid qaar ka mid ah degmooyinka kale ee Galmudug, iyadoo laga talo galinayo habka ugu haboon ee lagu mideyn karo aragtida guud ee haween waynaha, si ay iskaashi uga yeeshaan wada raadinta Xuquuqda Haweenka, gaar ahaan awood siinta Haweenka doonaya ka qayb galka siyaasadda guud iyo gaar ahaan tan gollayaasha Baarlamaanka Federaalka.
Kulankan oo socon doona mudo labo maalmood ah ayaa lagu lafo gurayaa muhiimadda Haweenka iyo doorka wada jirkoodu ku yeelan karo helidda qoondada Haweenka ee doorashooyinka heer Federaal, iyadoo Haweenka kulankan ka qayb galey ay ku dhawaaqeen in ay muhiim tahay wada gaaridda xal rasmi ah oo looga gudbayo kala daadsanaanta haweenka u ordaya in ay buuxiyaan qoondada haweenka ee 30%.
Agaasimaha Guud ee Wasaaradda haweenka Galmudug, Maxamed Cali Alaale oo ugu horeyn hadal ka jeediyay furitaanka talo is waydaarsigan ayaa haweenka looga baahanyahay inay gacan ka geystaan dadaallada lagu xaqiijinayo qoondada haweenka ee ka qayb-galka hoggaaminta Dalka.
Qaar kamid ah Xildhibaannada haweenka ah ee ku jira Baarlamaanka Galmudug oo madashan goobjoog ka ahaa ayaa tilmaamay in shirkan uu ahmiyad gaar ah siinayo inay noqdaan kuwa isku duuban, oo aragti mid ah ka yeesha kaalinta uga aadan qoondada haweenka ee 30%.
Wasiirka Haweenka iyo Xuquuqda Aadana Galmudug Ubax Xuseen Dhiblaawe ayaa haweenka kulanka ka qayb galey kula dar-daarantay in degmooyinkii ay ka yimaadeen kula laabtaan talooyin waxgal ah oo lagu xoojinayo qoondada haweenka.
Kulankan oo xirmaya maalinta beri ah ayaa qayb ka noqonaya shirarka is daba-jooga ah ee Wasaaradda Haweenka Galmudug ku taageerayso haweenka leh hanka siyaasadeed ee sanadkan ku tartamaya kuraasta labada Aqal ee dowladda.
