Wasaaradda Waxbarashada Soomaaliya ayaa soo bandhigtay 20 arday oo ku guuleeystay deeq waxbarasho heer Jaamacadeed oo ay Dowladda Soomaaliya ka heshay dowaldda Shiinaha.
20-ka arday ayaa ka kala socday maamul goboleedyada dalka ka jira iyo gobolada Hiraan iyo Banaadir, waxaana lagu wareejiyay warqadihii ay ugu bixi lahayeen dalka Shiinaha.
Wasiirka Waxbarashada iyo tacliinta sare, Wasiiru-dowladaha, Wasiir ku-xigenka iyo Xildhibaanno ka tirsan Baarlamaanka Soomaaliya ayaa ka qeyb galay munaasabadda ardayda lagu soo bandigayay.
Wasiirka waxbarashadda iyo tacliinta sare ee Xukumadda Fedraalka Soomaaliya Marwo Qadro Bashiir Cali ayaa hadalo dar daaran iyo dhiir gelin u jeedisay ardayda deeqda waxbarasho heshay, waxaaana ay tilmaamtay in ay ka tarjumaan oo ay ilaaliyaan sharafta shacabka Soomaaliyeed ee ay matalayaan.
“Waxaan ku faraxsanahay in adinkoo ka socda gobolada Soomaaliya in aad heshaan deeq waxbarasho, waxaadna wax u soo baranaysaan dowladiina iyo dalkiina , waxaana idinkaga baahanahay in aad noqotaan safiiro wanaagsan ee dalkiina usoo hooya sharaf iyo sumcad wanaagsan.”ayey tiri Wasiirka Waxbarashada iyo tacliinta sare.
Qaar ka mid ah ardayda ku guulaystay deeqda waxbarasho ee dalka Shiinaha oo isku jira Gabdho iyo Wiilal oo ka hadlay dareenkooda ayaa sheegay inay aad ugu faraxsanyihiin deeqda waxbarasho ee ay heleen.
