Wasaaradda Waxbarashada Hiddaha iyo Tacliinta sare ee Xukuumadda Federaalka Soomaaliya ayaa maant la wareegtay Iskuulada Al-macaarif iyo Al-mathal oo markii hore leesku dhihi jiray 21-ka October, kuwaas oo ku yaala degmada Waaberi ee gobolka Banaadir.
Agaasimaha guud ee Wasaaradda Waxbarashada iyo Agaasimaha Waaxda dugsiyada dalka ayaa la wareejiyay, waxeyna talaabadaan muujineysaa in dowladda Soomaaliya ay ka go’antahay sidii ay dalka uga hirgeli laheed nidaam waxbarasho oo Dowli ah, kaas oo ardayda Soomaaliyeed ay wax ku bara doonaan si lacag la’aan ah.
Agaasimaha guud ee Wasaaradda Waxbarashada, mudane, Axmed Xasan Yuusuf ayaa sheegay in dowladda soomaaliya ay wado qorshe lagula wareegayo dhammaan iskuuladii dalka ee dowladu gacanta ku heyn jirtay,isagoo ardayda u sheegay in si bilaash ama lacag la’aan ah ay wax ku bara doonaan.
Wasaaradda Waxbarashada ayaa horey ula wareegtay ilaa 25 Iskuul, iyadoona qorshaha Wasaaradda uu yahay in dhammaan iskuulada Dowliga ah ay la wareegto.
