Wasiir ku xigeenka Wasaaradda Warfaafinta Xukuumadda Federaalka Soomaaliya (XFS), mudane Aadan Isaaq Cali oo wareysi gaar ah siiyay Warbaahinta Qaranka ayaa sheegay in dalxiisku xilligaan uu yahay adduunka meelaha ugu badan ee dhaqaalaha uu ka soo galo dowladaha caalamka.
Wasiirka ayaa sheegay in Wasaaradda Warfaafintu ay saamileyda dalxiiska ay u qabatay kulan leyskugu keenayay oo ay kasoo qeyb galeen dhallinyaro badan haddane ay wado dadaallo lagu horumarinayo dalxiiska dalka.
Wasiir ku xigeenka Warfaafinta ayaa carrabka ku adkeeyay in Soomaaliya xilligaan ay u diyaarsantahay dalxiisayaal caalami ah iyo kuwo gudaha ah, isagoo xusay in cid walba oo daneyneysa arrimaha dalxiiska ay soo dhaweyn doonaan.
Mudane Aadan Isaaq Cali Wasiir ku xigeenka Warfaafinta ayaa dhallinyarada Soomaaliyeed ku dhiirigeliyay in ay ku dalxiisaan dalkooda ayna soo bandhigaan muuqaalada qurxoon ee dalkeena.
Soomaaliya ayaa leh goobo taariikhi ah oo ku haboon dalxiiska iyo cimilada ugu wanaagsan dunida, waxaana Wasaaradda Warfaafinta Dhaqanka iyo Dalxiisku ay billaawday dardar gelinta sidii dib loogu soo celin lahaa dalxiiskii dalka uu lahaan jiray.
