Agaasinka Bangiga Aduunka ayaa ansixiyay 137,5 milyan oo doolar oo lagu taageerayo ka hortaga Covid19 iyo xaaladaha Bani aadamnimo ee ka dhashay fataahada Soomaaliya.
Qoraalka ka soo baxay Bangiga Aduunka ayaa lagu sheegay in Bangiga oo ka jawaabaya xaaladaha adag ee Soomaaliya ka jira sida la tacaalida Covid19, Fatahaadaha iyo abaaraha muda dheer k jira Soomaaliya ay isku raaceen bixinta lacagtan oo deeq ah si loogu taageero Dowladda Soomaaliya oo dadaal ugu jirta la tacaalida dhibaatooyinkan.
Sanduuqa Hormarinta Caalamiga ah ee Bangiga oo soo marinaya Mashruuca ka jawaabida xasarada Soomaaliya ayaa bixinayaa dhaqaalahan.
Soomaaliya oo muda 30 sano ah ku jirtay colaado, Abaar iyo dhibaatooyinka aafeeyay hey’adaha muhiimka ah ayaa wajahday cudurka Safmarka ah ee Covid19.
Mashruuca ka jawaabida xasaradaha Soomaaliya oo bixinaya lacagtan waxaa looga talagalay in ay gaarto dadka 1.7 milyan (Hal milyan iyo Todoba boqol oo qof).
Waxaa ku jira 20 milyan oo doolar oo si deg deg loogu taageerayo latacaalida cudurka Covid19 .
Bangiga Aduunaka ayaa Xafiiska Ra’isulwasaaraha XFS ku amaanay hogaaminta dadaalka dowladda Federaalka Soomaaliya ay ku bixinayso ka jawaabida dhibaatooyinka ka dhashay fatahaadaha iyo latacaalida Covid19.
Wasiirka Maaliyadda XFS Cabdiraxmaan Ducaale Beyle ayaa ayaa uga mahad celiyay deeqdaan Bangiga aduunka siinayo Soomaaliya.
Bishii Maarso Bangiga Aduunka iyo Hey’adaha Dhaqaalaha Caalamiga ayaa sheegay in Soomaaliya u qalanto in laga cafiyo daymaha taasoo irdaha u furaysay kaalmooyinka Dhaqaale iyo mashaariic Hey’adaasi siiyaan Soomaaliya si ay u soo kabato una gaarto isku filnaan waxaana arintaasi ku timid dadaalkii dib u habeynta maamulka Maaliyadda oo sameysay Dowladda Federaalka Soomaaliya.
