Wasiir ku-xigeenka Wasaaradda beeraha ee Xukuumadda Soomaaliya ayaa maanta tababar ku saabsan horumarinta wax soo saarka beeraha u furey qaar ka mid ah iskaashatada beeraleyda gobolka Shabeelaha Hoose.
Munaasabadii lagu furayay siminaarka ayaa waxaa ka qeyb galay Wasiir ku-xigeenka Wasaradda beeraha, Agasimaha Guud ee Wasaaradda, qaar ka mid ah iskaashatada beeraleyda ayaa ujeedkiisu yahay sidii loo dhiiri gelin lahaa beeraleyda, kaasi oo socon doono muddo saddex cisho ah.
Agaasimaha Guud ee Wasaaradda Beeraha Maxamuud Maxamed Maxamed ayaa sheegay in beeraleyda loogu faa’iideynayo sida ay wax ku soo saari karaan, isla markaana ay Wasaaraddu dhiiri gelineyso dadka beeraleyda ah.
“80% beeraleyda yar yar ayaa ah kuwa wax soo saarka dalka ugu badan, gaar ahaan cuntada dalka laga cuno, marka waxaan uga gol’leenahay in iskaashatooyinka cagaf la siiyo oo la horumariyo, si wax soo saarka dalka loo kordhiyo”ayuu yiri Agaasimaha Guud.
Wasiir ku-xigeenka Wasaaradda Beeraha ee Xukuumadda Soomaaliya Cabdicasiis Saalax Carmaan oo furay siminaarka ayaa sheegay in Wasaaraddu xoogga saareyso sare u qaadida wax soo saarka dalka.
“Waxaan ku dadaalaynaa in aan wax ka qabano dhibaatada haysata ama ay tabanayaan beeraleyda, ujeedka waxa uu yahay in la tayeeyo wax soo saarka dalaga beeraha, waxaana naga go’an inaan horumarino beeraleyda” ayuu yiri Wasiir ku-xigeenka.
