Wasiir ku-xigeenka Wasaaradda Warfaafinta, Dhaqanka iyo dalxiiska Mudane Cabdullaahi Colaad Rooble ayaa ka qeyb galay munaasad ku saabsan soo nooleynta dhaqanka oo lagu qabtay xarunta Degmada Xamarweyne ee Gobolka Banaadir.
Munaasadda ayaa waxaa kaloo ka qeyb galay Guddoomiye ku-xigeenka arrimaha bulshada ee maamulka Gobolka Iimaan Nuur Iikar, Guddoomiyaha Degmada Xamarweyne Cabdiqaadir Maxamed Cabdiqaadir iyo dadweyne aad u fara badan, iyadoo goobta lagu soo bamdhigay cayaaraha hidaha iyo dhaqanka.
Guddoomiyaha Degmada Xamarweyne Cabdiqaadir Maxamed Cabdiqaadir oo goobta ka hadlay ayaa sheegay in uu aad ugu faraxsanyahay in xarunta Degmada ay marti geliso xaflad ku saabsan soo nooleynta dhaqanka, isagoo intaa ku daray inay sii joogteyn doonaan munaasabadaha nuucaani oo kale ah.
Wasiir ku-xigeenka Wasaaradda Warfaafinta, Dhaqanka iyo dalxiiska Mudane Cabdullaahi Colaad Rooble ayaa sheegay in Wasaaraddu ay xoogga saareyso soo nooleynta dhaqanka oo uu ku tilmaamay in ay qeyb weyn ka qaadan karto isdhexgalka bulshada iyo nabadda, waxaana uu Maamulka Degmada uga mahadceliyay sida ay u soo qaban qaabiyeen xafladda.
Sidoo kale xaflad tan la mid ah oo lagu weyneynayay soo nooleynta dhaqanka ayaa lagu qabtay Muqdisho, kaasi oo ay ka qeyb galeen ardayda Jaamacadaha iyo dugsiyada Gobolka Banaadir qaarkood, Ururrada dhallinyarada degmooyinka gobolka, Golaha Abwaanada Soomaaliyeed, taasi oo hal ku dhigu ahaa soo nooleynta dhaqanka.
Wasiir ku-xigeenka Wasaaradda Warfaafinta, Dhaqanka iyo dalxiiska Mudane Cabdullaahi Colaad Rooble oo isna hadal ka jeediyay xafladda ayaa ka mahadceliyay sida bulshada ay uga g’antaha inay ka qeyb qaataan dib u soo nooleynta dhaqanka Soomaaliyeed.
Sawir Qaade:- Cabdullaahi Muxudiin Codka
