Wasiir ku-xigeenka Wasaaradda Warfaafinta, Dhaqanka iyo Dalxiiska ee Xukuumadda Federaalka Soomaaliyaย Mudane Xildhibaan Aadan Isaaq ayaa caawa si rasmi ah u furay tartan cilmiyeedka bisha Ramadaan oo sanad waliba ay Warbaahinta Qaranka u qabato degmooyinka gobollada dalka, iyadoo sanadkii lixaad barnaamijka ay taaba galineyso Maamulka Gobolka Banaadir.
Munaasabad kooban oo lagu furayey Tartan Cilmiyeedka Ramadaan ee sanadkan oo lagu qabtay Istuudiyaha Radio Muqdisho ayaa waxaa ka qeyb galay Wasiir ku-xigeenka Warfaafinta, Guddoomiye ku-xigeenada howlaha guud iyo Arrimaha bulshada ee Gobolka Banaadir, Agaasimaha Guud ee Wasaaradda Warfaafinta iyo Agaasimaha Radio Muqdisho.
Agaasimaha Radio Muqdisho Mudane Cabdifataax Daahir Jeyte ayaa sheegay in tartan cilmiyeedka uu yahay mid loo qabto Gobollada dalka iyo 17-ka degmo ee Gobolka Banaadir, isla markaana ay caawa ku tartami doonaan Degmooyinka Kismaayo oo difaacaneysa tartanka kana tirsan Gobolka Jubbada Hoose iyo Boondheere oo ka tirsan Gobolka Banaadir.
โHalkan aqoon ayaa la isku weydaarsadaa, dadyow kala duwan ayaa isku barta, waxaan rajeynayaa in uu si nabad ah noogu dhamaado sida sanadkii hore oo kaleโ ayuu yiri Agaasime Cabdifataax Daahir Jeyte.
Agaasimaha Guud ee Wasaaradda Warfaafinta, Dhaqanka iyo Dalxiiska Mudane Cabdiraxmaan Sheekh Yuusuf Al Cadaalla ayaa sheegay in tartankan uu soo maray marxalado kala duwan, waxaana uu xusay in ujeedka tartanka yahay in ay ka faaโiideystaan dhammaan Ummadda Soomaaliyeed, meelkasta oo ay joogaan oo ay kororsadaan cilmi.
โFaaโiidooyin badan ayaa Barnaamijkan laga dhexlay, waxaana la ogaaday in barnaamijkan uu xoogga saarayo barashada taariikhda dalka, waxaan hortiina uga mahadcelinayaa howlwadeenada Wasaaradda oo u istaagay in uu taabo galo tartanka, isla markaana ka soo shaqeeynayay muddo fog.
Guddoomiye ku-xigeenka Howlaha guud ee Gobolka Banadir Aadan Sheekh Cali Fiidow oo isna munaasabadda ka hadlay ayaa sheegay inay tahay wax lagu farxo in lagu tartamayo aqoon, loona baahanyahay ka qeyb galayaasha inay maskaxdooda maalaan, waxaana uu Madaxda iyo howlwadeenada Warbaahinta Qaranka, gaar ahaan guddiga tartanka uga mahadceliyay hannaanka ay u soo diyaariyeen.
Guddoomiye ku-xigeenka arrimaha bulshada ee Gobolka Banaadir Basma Caamir Jakeeti ayaa Madaxda Wasaaradda Warfaafinta iyo agaasimeyaasha Wasaaradda Warfaafinta uga mahadcelisay qabsoomidda barnaamijka tartan cilmiyeedka, waxaana ay si gaar ah labada degmada ee ku tartamaya u rajeeysay inay guuleystaan, sanadkan kiisa xigana ay ku gaaran horumar.
Wasiir ku-xigeenka Wasaaradda Warfaafinta Mudane Aadan Isaaq oo si rasmi ah u furay tartan cilmiyeedka Warbaahinta Qaranka ayaa ugu horeyn Ummadda Soomaaliyeed ugu hambalyeeyay bisha Ramadaan, waxaana uu Alle ka baryay in Soomaaliya uu Alle dhibaatada ka qaado, bulshaduna ay is cafiyaan.
Wasiir ku-xigeenka Warfaafinta ayaa xusay in barnaamijka uu yahay mid wacyi gelin ah oo bulshada lagu barayo taariikhdooda, waxaana uu intaa ku daray inay joogteyn doonaan barnaamijyada nuucaani oo kale ah.
โSharaf weyn ayay noo tahay inaan daah furno tartan cilmiyeedka, tartanka oo ay Warbaahinta Qaranka u qabato 17-degmoย ee gobolka Banaadir iyo Caasimadaha Gobollad dalka, kaasi oo ujeedkiisu yahay in ay bulshada ka faaโiiddo aqoon, waxaan u mahadcelinayaa Maamulka Gobolka Banaadir oo suurta geliyay in uu qabsoomo, tartamayaasha waxaan kula dar daarmayaa inay soo bandhigaan aqoontooda, iyadoo ay ku jirto si aqlaaqlehโ ayuu yiri Wasiir ku-xigeenka Warfaafinta.
Tartankii ugu horeeyey ee Tartan cilmiyeedka Ramadaan ee sanadkan ayaa waxaa caawa lagu daah furay tartameyaasha degmooyinka Kismaayo iyoย Waaberi oo ka kala tirsan Gobolada Jubbada Hoose iyo Banaadir.
