Wasiir ku-xigeenka Wasaaradda Waxbarashada Hiddaha iyo Tacliinta sare ee Xukuumadda Federaalka Soomaaliya, Mudane Feysal Cumar Guuleed ayaa maanta xarunta Wasaaradda kulan kula qaatay Guddoomiyaha Jaamacadda Omdorman Islamic University ee dalka Suudaan Alhassan Almuthana iyo wafdi uu hogaaminayo.
Kulanka ayaa intii uu socday looga hadlay iskaashiga Horumarinta Waxbarashada iyo kor u qaadista deeqaha waxbarasho ee ardayda Soomaaliyeed ay ka helaan dalka Suudaan.
Gudoomiyaha Jaamacaada Omdurman ee dalka suudaan ayaa Wasiir ku-xigeenka Wasaaradda Waxbarashada mudane Feysal Cumar Guuleed kala hadlay Qeybta Daraasaadka Sare ee Jaamacadda Omdorman Islamic University oo laga furay magaalada Muqdisho.
Guddoomiyaha Jaamacadda Omdorman ee dalka Suudaan Alhassan Almuthana iyo wafdi uu hogaaminayo ayaa waxa soo dhaweyn u sameyay Agaasimaha Tacliinta Sare ee Wasaaradda Waxbarashada mudane Ismaaciil Yuusuf Cismaan waxa ayna ka wada hadaleen kor u qaadista Tacliinta sare iyo sidii ay qeyb muhiim ah ugu qaadan lahaayeen.
Mudane Ismaaciil Yuusuf Cismaan Agaasimaha Tacliinta Sare ayaa sidookale kala hadlay Guddoomiyaha Jaamacadda Omdorman Islamic University ee Dalka Suudaan Alhassan Almuthana iyo wafdi uu hogaaminayo, ardayda Soomaaliyeed ee waxka barta dalka Suudaan iyo sidii loo kordhin lahaa deeqaha waxbarasho ee ardayda Soomaaliyeed ay ka helaan dalka Suudaan.
