Wasiirka Warfaafinta, Dhaqanka iyo Dalxiiska ee Xukuumada Soomaaliya Mudane Maxamed Cabdi Xayir Maareeye oo ay wehliyaan Xildhibaan Maxamed Cumar Dalxa, Taliyaha Hay’ada Nabdsugida iyo Sirdoonka Qaranka Jeneraal Cabdiraxmaan Maxamed Tuuryare (Cumda), Abwaanno iyo Fanaaniin ka tirsan Hobalada Qaranka ee Waaberi ayaa waxa ay kormeer ku tageen Hooyga Hobolada Waaberi ee Ex-Fiyoore, wuxuuna Wasiirku ku amray dadka sida sharci darada ah ku degan halkaasi inay uga guuraan mudo 10-cisho gudahood ah, iyadoo cidii aan amarkaasi u hogaansmaina talaabo laga qaadi doono.
Wasiir Maareeye oo Warbaahinta Qaranka kula hadlay ilinka hore Ex-fiyoore ayaa sheegay in go’aanka halkaasi looga rarayo dadka sharci darada ku degan uu ka dambeeyay kadib cabasho uga timid xubnaha Hobalada Qaranka ee Waaberi, taasi oo ah in dad badan si aan sharci aheyn ku degnaayeen guryaha ku yaala Ex-fiyoore.
Sidookale Wasiirka Warfaafinta, Dhaqanka iyo Dalxiiska ee Xukuumada Soomaaliya ayaa xusay in dadka mudadii burburka dalka uu kujiray deganaa Ex-fiyoore ee aan aheyn Hobolada Qaranka Waaberi iminka loo baahan yahay inay u guuraan qeybaha kale ee magaalada, maadaama buu yiri Wasiirku hormar iyo isbedel badan uu kajiro Caasimada Muqdisho.
“Waa mahadsantihiin maanta waxaa sharaf inoo ah inaan soo booqano xaruntii Hobalda Waaberi ee Ex-fiyoore oo aan ugu imaano runtii odayaashan, waaweyn Harawo, Sangub, Barrow Cabdikariin Jiir, Dalxa oo Xildhibaan ah fanaana ah, Oday Cabdulle iyo odayaahsan dhan inaa halkan ugu imaano ani iyo taliyaha nabadsugida Soomaaliyeed, runtii waxaa mudo nasoo gaarayay cabasho ka soo baxayay Hobalada Waaberi ee waaweeyn oo laga qabsaday guryahoodii iyo dhulkii ay wacyigalinta ku sameyn jireen, waxaan leenahay walaalaha halkaan degan intii aad ku nacfin karteen waa ku nacfideen, intaa degnaa karteen waa degneedeyn laakiin maanta waxaa loo celinayaa gacmihii lahaa gacmihii hobalada Waaberi, isaga guura walaalayaal waxaan amar ku bixneynaa qof kastoo aan kamid aheyn Hobalada Waaberi inuu mudio 10-cisho ah ka ka guuraan cidii aan kaguurin talaabo sharciyaa laga qaadayaa”ayuu yiri Wasiir Maareeye.
Wasaarada Warfaafinta ayaa mudooyinkii dambe waday dadaalo gacanta Wasaarada dib loogu soo celinayo isla markaana dadka sida sharci darada ah ku degan looga saarayo xarumihii iyo guryihii ay Wasaaradda laheyd oo oo ay ka mid yihiin Ex-Fiyoore iyo Tiyaatarka Qaranka.
