Wasiirka Wasaaradda Warfaafinta, dhaqanka iyo dalxiiska ee Xukuumadda Soomaaliya Mudane Maxamed Cabdi Xayir “Maareeye” oo maanta shir guddoominayay shirka todobaadlaha ee xiriirka dowladda ayaa ku baaqay in la sameeyo Website ay ku mideysanyihiin Wasaaradaha xukuumadda, si halkaasi looga daalacdo horumarka dowladda, iyadoo shirka uu goob joog ka ahaa Wasiir ku-xigeenka Wasaaradda Warfaafinta, dhaqanka iyo Dalxiiska mudane Cabdullaahi Colaad Rooble.
Shirka ayaa waxaa ka qeyb galay Qaar ka mid ah afhayeenada dowladda, madaxda xiriirka bulshada u qaabilsan Wasaaradaha, quburo saxaafadeed iyo mas’uuliyiin kale, waxaana diiradda lagu saaray sidii lagu heli lahaa Website, laga ogaado xogta Wasaaradda waliba, isla markaana uu website-ka dowladda noqdo, mid Wasaarad kasta ay links ku leedahay, taasi oo sahleysa in bulshada ay halkaasi ka daalacdaan horumarka dowladdu ay ku talaabsatay.
Qaar ka mid ah quburadii shirka ka qeygalay ayaa soo jeediyay in website-ka dowladad lagu bilaabo ilaa iyo lix Wasaaradood, isla markaana Wasaaradaha kalena dib lagaga soo daro linkiyadooda, uuna lahaado naqshad isku mid ah oo ay kaga duwanyihin Website-yada kale.
Wasiirka Warfaafinta oo shirka soo xiray ayaa hoosta ka xariiqay in arrimaha Website-ka dowladda xoogga la saari doono, golaha Wasiiraduna uu horgeyn doono qorshe cad oo ku saabsan habka loo marayo barnaamijyada ku aadan wacyigelinta bulshada, si loo helo hal mowduuc oo ay dowladdu si isku mid ah uga hadlaan halkaasi mowduuc.
Sawir Qaade:- Maxamed Macalin Xasan “White-ka”
