Wasiirka Wasaaradda Warfaafinta, dhaqanka iyo dalxiiska ee Xukuumadda Federaalka Soomaaliya ayaa maanta booqday xaruntii Farshaxanka ee Wakaaladda Murtida iyo madadaalada oo laga saaray Dadkii deganaa.
Ciidamada Booliska Soomaaliya ayaa ka saaray dadkii deganaa xarunta Farshaxanka kaddib markii ay dhamaatay mudadii loo qabtay in dadkaasi ay kaga baxaan xaruntaas.
Wasiirka Wasaaradda Warfaafinta, Taliyaha qeybta Booliska iyo hobolada Waabari ayaa kormeeray xaruntaan oo ku taalla Hooyga fanaaniinta ee Ex-fiyoore halkaasi oo wax soo saar u ahayd Fanaaniinta Soomaaliyeed.
Taliyaha qeybta Booliska gobolka Banaadir Cali Maxamuud Cali Shariif, ayaa uga digay dadka inay sii degnaadaan xarumaha Dowladda, waxaana uu tilmaamay inay u taaganyihiin sidii xarumaha dowladda looga saari lahaa dadka sida sharci darada ah u degan.
Maareeye kuxigeenka Tiyaatarka Qaranka Cabdikariin Faarax Qaareey Jiir ayaa kaga mahad celiyay Dowladda inay gacantooda kusoo celiso xaruntii Farshaxanka.
“waxaan uga mahad celineynaa Wasiirka sida uu fuliyay balantii, waa inay ku deydaa Wasiiradda kale, waxa ay noo ahayd halkaan xarun farshaxan dhaqan iyo madaadaalo”
Wasiirka Wasaaradda Warfaafinta, Dhaqanka iyo dalxiiska Mudane Maxamed Cabdi Xayir Maareeye ayaa sheegay in dib usoo celinta xarunta Farshaxanka ay qeyb ka tahay dadaalada lagu soo nooleynayo xarumihii hore oo ay ka mid tahay Tiyaatarka Qaranka, oo ay qorsheynayaan in lagu dhiso iskaa wax u qabso.
“ Guri Warfaafinta, warfaafinta ayaa iska leh, hooy boolis, booliska ayaa iska leh, waxaan u mahad celineynaa dadkii u hogaansamay amarkeena, dhowaan waxaan u furi doonaa Tiyaarterka oo aan dhiseyno, marka halaga qeyb qaado dib u dhiska tiyaatarka”
