Wasiirka amniga gudaha Mudane Cabdirisaaq Cumar Maxamed iyo Wasiirka Warfaafinta Mudane Maxamed Cabdi Xayir “Maareeye” ayaa ka hadlay qarax maanta ka dhacay maqaayad ku taala sarta Hooyooyinka ee degmada Xamar weyne.
Dhagar qabe ka tirsan maleeshiyaadka Al-Shabaab oo isku soo xiray waxyaabaha qarxa ayaa galay goobta maqaayadda oo ay ku sugnaayeen koox wariyeyaal ah iyo dad kale oo goobta ka shaahiyeynayay, waxaana damaciisu ahaa in uu gumaado dadka halkaasi isugu tegay, balse qaar mid ah suxufiyiinta oo ka shakiyay ninka isqarxiyay ayaa goobta isaga cararay, taasi oo yareysay qorshihii uu ku doonayay in uu dadka ku laayo.
Qaar ka mid ah wariyeyaashii ka badbaaday weerarka ismiidaaminta ah ayaa Warbaahinta Qaranka u sheegay in ay ka shakiyeen, isla markaana ay keentay inay goobta isaga cararaan.
Wasiirka amniga gudaha ee Xukuumadda Soomaaliya Mudane Cabdirisaaq Cumar Maxamed oo la hadlay Warbaahinta Qaranka ayaa sheegay in ujeedka dhagar qabaha isqarxiyay uu fashilmay, isla markaana uu aad u yaraaday in qasaare intaa ka badan ay ka dhashaan falkii uu isku qarxiyay, maadaama dadkii ka shakiyay ay goobta isaga carareen.
Wasiirka Warfaafita, Dhaqanka iyo Dalxiiska ee Xukuumadda Soomaaliya Mudane Maxamed Cabdi Xayir “Maareeye” ayaa dhanka kale sheegay in horaanta sanadkan guud ahaan dalka laga xoreyn doono maleeshiyaadka Al-Shabaab, isagoo hoosta ka xariiqay in la joogteyn doono howlgallada ka dhanka ah ee Al-Shabaab, si looga hortago falalka ay bulshada ku dhibaateynayaan.
