Wasiirka Amniga Gudaha Xukuumadda Federaalka Soomaaliya Mudane Maxamed Axmed Sheekh Cali (Doodishe) ayaa kormeer ku tagay Xafiisyada Xarunta dhexe ee Hay’adda Socdaalka iyo Jinsiyadda Soomaaliya ee Magaalada Muqdisho.
Ugu horeyn Agaasimaha Guud ee Hay’adda Socdaalka iyo Jinsiyadda ayaa sidoo kale ka warbixiyay waxqabadka Hay’adda ee sanadkii la soo dhaafay isagoo dhanka kalana soo jeediyay qorshayaasha u degsan Hay’adda Socdaalka iyo Jinsiyadda shanta sano ee soo socoto. Agaasime Cabdul ayaa Wasiirka iyo Madaxda kale ee Wasaaradda la wadaagay caqabadaha shaqo ee ku hor gudban Hay’adda isagoo sidoo kale soo bandhagay Xalka looga gudbi karo cabaqadaha uu xusay Agaasimaha Guud ee Hay’adda.
Dhanka kale Wasiirka, Wasiir ku xigeenka iyo Wasiiru dowlaha Amniga ayaa kormeer ku sameeyeen Goobaha laga soo dago iyo kuwa laga baxo ee Garoonka Aadan Cabdulle ee Magaalada Muqdisho isagoo warbixino ka dhageystay Agaasimayaasha Waaxyaha iyo kormeerayaasha Socdaalka Garoonka Aadan Cabdulle. Sidoo kale Xafiisyada uu kormeerka ku sameeyay Wasiirka Amniga gudaha waxaa kamid ahaa Waaxda Ajaanibta iyo fiisooyinka iyo Waaxda Jinsiyadda isagoo booqday Xarunta ugu weyn ee laga bixiyo adeegga baasaboorka Soomaaliya ee Degmada Hodan.
Wasiirka Amniga Gudaha Mudane Maxamed Axmed Sheekh Cali ayaa bogaadiyay shaqada baaxadda leh ee Hay’addu ka heyso dal iyo dibedba isagoo uga mahadceliyay Agaasimaha guud iyo guud ahaan Howlwadeenada Hay’adda Socdaalka iyo Jinsiyadda ee ku kala sugan dalka iyo dibeddiisa. Wasiirka ayaa sheegay in caqabadaha shaqo ee ka jiro Hay’adda ay si wadajir ah uga wadashaqeyn doonaan Wasaaradda iyo Agaasinka Guud ee Hay’adda Socdaalka iyo Jinsiyadda isla markaana lala imaan doono xal waara ee looga gudbi doono caqabadaha jiro.
Ugu dambeyn, Kormeerka shaqo ee Wasiirka Amniga Gudaha Xukuumadda Federaalka Soomaaliya ayaa waxaa ku wehlinaayay Wasiiru Dowlaha Amniga gudaha Mudane Maxamed Cali Xagaa iyo Wasiir ku xigeenka Wasaaradda Amniga Gudaha Mudane Isaaq Maxamed Maxamuud (Obow). Dhanka kale Hay’adda Socdaalka iyo Jinsiyadda waxaa iyana goobjoog ahaa Kormeerka uu ku yimid Xafiisyada xarunta dhexe ee Hay’adda K/xigeenada Agaasimaha Guud iyi qaar kamid ah Waaxyaha Hay’addu ka koobantahay.
