Wasiirka Amniga Gudaha ee Xukuumadda Federaalka Soomaaliya Mudane Maxamed Axmed Sheekh Cali ayaa xafiiskiisa kula kulmay Taliyeyaash Xoogga Dalka iyo Booliska Soomaaliyeed.
Wasiirka ayaa warbixin ka dhagestay Taliyaha Ciidanka Xoogga Dalka Soomaaliyeed Jeneraal Odowaa Yuusuf Raage oo ku saabsan howlgallada ka dhanka ah argagixisada Al-Shabaab ee ka socda Gobolada Dalka iyo Guulaha laga gaaray.
Sidoo kale Wasiirka Amniga Gudaha ayaa warbixin ku aadan sidii deegaannada laga xoreeyay Argagixisada loo geyn lahaa Boolis, ka dhageystay Taliyaha Ciidanka Booliska Soomaaliyeed Sareeyo Gaas Cabdi Xasan Maxamed Xijaar.
“Maanta waxaan warbixin guud ka dhegaystay Taliyaha Ciidanka Xoogga oo iiga warramay hawlgallada ka dhanka ah argagixisada ee ka socda deegaannada kala duwan ee dalka.
Sidoo kale, Taliyaha Booliska ayaa ila wadaagay qorshaha ku aaddan xasilinta iyo la wareegidda amniga deegaannada la xoreeyay”. Ayuu yiri Wasiirka Amniga Gudaha.
Wasaaradda Amniga Gudaha waxa ay u heelan tahay sidii ay shacabka Soomaaliyeed u heli lahaayeen amni lagu kalsoon yahay.
