Wasiirka Amniga Gudaha XFS mudane Maxamed Abuukar Isloow (Ducaale) ayaa Muqdisho ka furay Shirka isku xirka howlaha Hay’adda Socdaalka iyo Jinsiyadda ee Soomaaliya.
Shirkaan ayaa la qabtaa 3-dii biloodba mar, waxaana kasoo qaybgala Laamaha Hay’adda ee Gobolada, Saraakiisha xarunta dhexe ka howlagala iyo Hay’adaha wada shaqeynta la leh Hay’adda Socdaalka oo ay kamid yihiin Booliska ,Gobolka Banaadir iyo Wasaaradaha qaarkood.
Agaasimaha hay’adda socdaaalka iyo jinsiyadda Jamhuuriyadda federaalka Soomaaliya Col Maxamed Aadan Jimcaale {Koofi} ayaa si faah-faahsan uga hadlay shirka sadax billaha ah ee maanta u furmay shaqaalaha hay’adda, waxa uuna sheegay in ujeedka shirkani yahay in lagu kala qaato warbixino ku saabsan howlaha hay’ada u qabsoomay 3-dii bilood ee la soo dhaafay.
Wasiirka amniga gudaha Soomaaliya Maxamed Abuukar Isloow {Ducaalle} ayaa ka qeyb galayaasha kulanka xusuusiyay ahmiyada ay leedahay si dhow u wada shaqeynta iyo gudashada waajibaadka ka saran howlaha socdaalka dalka.
