Munaasabad uu xilka kula waregayay Taliyaha cusub ee ciidanka Booliska Soomaaliyeed Jeneraal Bashiir Cabdi Maxamed ayaa maanta ka dhacday magaalada Muqdisho, taasi oo ay goob joog ka ahayeen Wasiirka amniga, Taliyaha Hay’adda Nabad sugidda iyo mas’uuliyiin kale.
Wasiirka Amniga gudaha ee Xukuumadda Soomaaliya Mudane Maxamed Abuukar Islow Ducaale ayaa kula dardaarmay Taliyaha Booliska in uu si hufan uu u guto waajibaadkiisa shaqo ee loo igmaday.
Taliyaha cusub ee Ciidamada Booliska Sareeyo Guuto Bashiir Cabdi Maxamed ayaa horay uga mid ahaa Taliye kuxigeenada Ciidanka Booliska Soomaaliyeed.
Golaah Wasiirada Xukuumadda Soomaaliya ayaa 19-kii bishan waxaa ay magacaabeen Taliyeyaasha Booliska, Nabadsugida iyo Asluubta, waxaana sidoo kale dhawaan xilkiisa la wareegay Taliyaha Hay’adda Nabad sugidda iyo sirdoonka Qaranka, iyadoo sidoo kale lafilayo in dhawaan uu xilkiisa isna la wareego Sareeyo Guud Bashiir Maxamed Jaamac oo loo magacaaby Taliyaha Ciidanka Asluubta.
