Wasiirka Amniga Xukuumadda Federaalka Soomaaliya mudane Maxamed Abuukar Islaw oo ka qeyb galaya shirka urur goboleedka IGAD uga socda dalka Suudaan ayaa gaaray magaalada Khartuum ee caasimadda dalkaas.
Wafdiga Wasiirka waxaa garoonka diyaaradaha ku soo dhaweeyay Agaasimaha guud ee iskaashiga caalamiga ah ee Wasaaradda Arrimaha gudaha ee Suudaan Xaatim Maxamuud Cabdirisaaq, Safiirka Soomaaliya ee Suudaan Danjire Maxamed Sheekh Isxaaq Madaxa ganacsiga Safaaradda Soomaaliya ee Suudaan Mudane Yuusuf Jeeg iyo Madaxa socdaalka iyo jinsiyadda ee Safaaradda Mudane Yacquub.
Mudane Abuukar Ducaale Islow ayaa dalka Suudaan uga qeyb galaya shirka urur goboleedka IGAD, kaasi oo diiradda lagu saarayo hanaanka isu socodka dadweynaha iyo ganacsiga, waxaana uu kulamo la qaadan doonaa inta uu joogo madaxda ka qeyb galeysa shirka iyo kuwa dalka Suudaan oo uu kala hadli doono xoojinta iyo wadashaqeynta kala dhexeysa Soomaaliya.
