Wasiirka Arrimaha dibadda iyo dhiirigelinta maalgeshiga ee Xukuumadda Soomaaliya Mudane Dr. Cabdusalam Hadliye Cumar ayaa sheegay in weerarada argagixisadu ay ka geysanayaan goobaha ay shacabka ku kulmaan aysan saameyn doonin diblomaasiyiinta dalka imaaneysa.
Dr. Cabdusalaam Hadliye Cumar oo la hadlay Radio Muqdisho ayaa ugu horeyn tacsi u diray ehelada iyo asaxaabta dadkii ku dhintay Qaraxii ka dhacay Hotelka Jazeera ee magaalada Muqdisho, isagoo intaa ku daray in falka ay geysanayaan argagixisadu aysan saameyn doonin horumarka ay dowladda ku talaabsaneyso.
“Waa qarax Islaam-nimada ka baxsan, waa mid ka baxsan beni’aadanimada, tacsi ayaan u direynaa dadkii ku dhintay weerarka argagixiso, adduunka oo dhan ayaa ka xun falkaasi, shacabka Soomaaliyeed ayaa ka xun, Soomaaliya horey ayay u soconeysaa, uma dhutineyno, weeraro naf la caari ah oo lala beegsado goobaha ay shacabka isugu yimadaan”ayuu yiri Wasiir Cabdisalaan
Wasiirka Arrimaha dibadda ayaa xusay in saaxiibada Soomaaliya aysan saameyn doonin weerarada kooxa argagixisada ay ka geysanayaan gudaha dalka, dowladuna ay waddo qorshe guud ahaan dalka oo dhan looga cirib tirayo maleeshiyaadka Al-Shabaab.
