Munaasabad maanta lagu qabtay magaalada Muqdisho ayaa lagu daahfuray cilmbiraaris laga sameyn doono Gobolada dalka oo ku saabsan dib u dhiska dalka iyo hay’adaha Dowliga ah doorka ay bulshada ku yeelnayaan, waxaana ka qeybgalay Munaasabadaasi Wasiirka Arimaha Gudaha iyo Federaalka Xukuumada Somaaliya Mudane Cabdiraxmaan Maxamed Xuseen (Odawaa), Gudoomiye ku xigeenada Gobolka Banaadir ,Wasiiro ka kala socday Maamul Goboledyada Jubbalnd, Koofur Galbeed, Galmudug, Puntland ,maamulada Shabeellaha dhexe, Hiiraan iyo qeybaha kala duwan ee bulshada.
Cilbiraasita ayaa waxaa sameyn doonta Xarunta Cilmibaarista SAHAN oo kaashaneysa bulshada rayidka ,Mamaul Goboleedyada iyo Dowladda dhexe ee Soomaaliya.
Guddoomiye ku-xigeenka dhinaca Siyaasadda Gobolka Banaadir Mudane Maxamed Axmed Diiriye ayaa sheegay in Maamulka Gobolka uu bogaadinayo Cilmibaaristan,
Wasiiradii ka socday Mamaul Goboleedyada Dalka ee kala ah Wasiirka arimaha gudaha iyo amniga Jubaland Maxamed Ibraagim Warsame Darwiish, Wasiirka Madaxtooyada Koofurgalbeed Maxamed Mursal, Wasiiru dowlaha arrimaha gudaha Puntland Cali Yuusuf Jaamac, Wasiirka Warfaafinta Galmudug Maxamuud Aadan Cismaan ayaa waxa ay si isku mid ah u sheegeen inay taageersan yihiin Cilmibaarista laga sameynayo Gobolada ee ku saabsan doorka ay bulshadu ku yeelnayaan Dib u dhiska dalka, waxaana Dowlad Goboleed kasta ay balanqaaday inay caawineyso Cilmibaarayaasha.
Guddoomiyaha Guddiga Adeega Bulshada Baarlamanka Soomaaliya Xildhibaan Cismaan Maxamuud Dufle ayaa ku taliyay in Cilmibaarista aan lagu koobin oo kaliya siyaasiyiinta, isla markaana qeybaha kala duwan ee bulshada lasiiyo mudnaan gooni ah.
Wasiirka Arimaha Gudaha iyo Federaalka Xukuumada Somaaliya Mudane Cabdiraxmaan Maxamed Xuseen “Odawaa” oo gabagabadii Munaasabdda ka hadlay ayaa u mahadceliyay Hay’adda sameyneysa Cilmibaarista la bilaabayo ee ku saabsan Doorka ay bulshada ku yeelaneyso Dib u dhiska Dalka, wuxuuna balanqaaday in Dowladda dhexe iyo Dowlad Goboleedyada si iskumid ah ay u qaadan doonan waxa kasoo baxa Cilmibaarista.
