Wasiirka Arrimaha Gudaha, Federaalka iyo Dib u heshiisiinta mudane Ahmed Moallim Fiqi, ayaa maanta ku daah fuaray Caasimadda Muqdisho Shirweynaha 2-aad ee Guddiga qaran ee haggida dad dhigista iyo dhacdooyinka muhiimka ah isaga oo kelmaddiisa kusoo qaatay ahmiyadda shirka, guddiga, arrimaha qabsoomay, qorsheyaasha iyo arrimo kale.
“Shirweynaha 2-aad ee Guddiga qaran ee haggida dad dhigista iyo dhacdooyinka muhiimka ah ayaa u jeedkiisu ahaa soojeedin howlaha qabsoomay iyo kuwa la qorsheynayo sanadka soo socda, kaas oo ah hirgelinta adeeg dad dhigis, oo sharciyad leh, oo la isku halayn karo” ayaa ka mid ahaa erayada Wasiirka.
Mudane Axmed Macallim Fiqi oo sii hadlaya waxaa uu isdul istaagay ahmiyadda guddiga, isaga oo dhiirigeliyay in la xoojiyo wadashaqeynta iyo dadaallada kelkeli iyo midka wadajirka ah isaga oo yiri “ Guddigaan, oo ah guddi xubnihiisu isku dhafan yihiin kuwaas oo metela heer Dowladd Federaalka iyo dowlad goboleedyada, ayaa ah midka ay ku xiran tahay xilgudashadiisa guulaysiga ama guuldarraysiga adeegga dad-dhigidda. Sababta sidaas aan u leeyahay ayaa ah in xubin kasta oo Guddigaan ka mid ah ay hoggaamiso Wasaarad ama hay’ad xiriir toos ah la leh adeegga dad-dhigidda. Sidaa daraaddeed, waxaan si xurmad leh kaga codsanayaa xubnaha Guddiga in aan xoojinno dadaalkeena, ha noqdo mid keli keli ah ama si wadajir ahba, ku aaddan ka miradhalinta dib-u-hirgelinta adeegga dad-dhigidda.
Ugu dambeyntii, Wasiirka Arrimaha Gudaha, Federaalka iyo Dib u heshiisiinta mudane Axmed Macallin Fiqi waxaa uu ku booriyay hey’adaha caalamiga oo horay taageero uga soo qaatay barnaamijkan in ay sii wadaan shaqada.
