Wasiirka arrimaha Gudaha iyo Federaalka ah ee Xukuumadda Soomaaliya Mudane Cabdiraxmaan Maxamed Xuseen (Odowaa) oo khudbad ka jeediyay gabo gabadii doorashada baarlaamanka dowlad goboleedka Galmudug ee maanta ka dhacday Cadaado ayaa sheegay in wixii maanta ka dambeeya mas’uuliyadda dhismaha dowlad goboleedka Galmudug ay ku wareegtay guddoomiyaha cusub ee hadda ku guuleystay xilka, waxaana uu ugu hambalyeeyay xilka loo doortay.
“Wixii maanta ka dambeeya dhameystirka dowlad goboleedka Galmudug, waxa ay mas’uuliyadeeda ku wareegtay guddoomiyaha baarlamaanka dowlad Goboleedka Galmudug Mudane Cali Gacal Casir, waxaana anagu kala shaqeyneynaa doorashada ku-xigeenadiisa iyo tan Madaxtinimada ee 4-ta bisha soo soco ku beegan, guul ayaan idin rajeynayaa” ayuu yiri Wasiirka Arrimaha gudaha.
Wasiirka ayaa xusay inay tahay tallaabo lagu farxo in qeybtii koowaad ee doorashada guddoonka baarlaamanka ay si nabad ah ku soo gabo gabowday, waxaana uu intaa ku daray in Xukuumadda Soomaaliya ay garab taagantahay geedi socodka shirka ka socda Cadaado.
