Wasiirka Batroolka iyo Macdanta ee Xukuumadda ee Soomaaliya Mudane Maxamed Mukhtaar Ibraahim ayaa kulan casho sharaf u sameeyay maamulka gobolka banaadir, iyo guddoomiyeyaasha 17-ka degmo ee gobolka, kaasi oo lagu qabtay xarunta Wasaaradda.
Kulanka ayaa looga hadlay sidii ay u wada shaqeyn lahaayeen Mas’uuliyiinta Wasaaradda Batroolka iyo maamulka gobolka ee ku aadan dhanka nabadgelyada iyo sidii ay isaga kaashan lahayeen wax ka qabashada nidaam la’aanta ka jirta shidaalka dalka soo gala, qaabka lagu daabulo iyo meelaha lagu iibiyo oo aan sax ahayn mararka qaar, marar badanna lagala kulmay dab ka kaco goobaha oo dhibaato naf iyo maalba halkaasi lagu waayey.
Wasaaradda waxa ay soo bandhigtay qaabka ku haboon booyadaha qaada shidaalka, Haamaha lagu kaydiyo iyo kaalimaha lagu qaybiyo shidaalka. Sidoo kale Wasiirku waxa uu ka hadlay Hindiso Sharciyeedkaas Wasaaraddu u gudbisay Golaha Wasiiradda ee Xukuumadda, dood dheer iyo fallanqeyn kaddibna Golaha Wasiirada waxay ansixiyeen Hindise Sharciyedkaas, intaas kaddib Xukuumada waxay u gudbisay sharcigaas Golaha Barlamaanka si ay uga doodaan. .
Wasiirka Wasaaradda Batroolka iyo Macdanta ee Xukuumadda ee Soomaaliya Mudane Maxamed Mukhtaar Ibraahim ayaa sheegay in Wasaaraddu diyaarisay xafiis loogu tala galay la talinta ee ah cidkasta oo doonaysa inay howlgeliso kaalin shidaal, isla markaana ka qaadato tilmaan buuxda oo tusinaysa meesha ku habboon kaalin, qaabka ugu habboon, agabka looga baahan iyo adeegga looga fadhiyo inay fuliso. Waxaa xusid mudan muhiimadda ay leedahay ilaalinta deegaanka.
