Wasiirka Beeraha iyo Waraabka ee dowlad goboleedka Galmudug Axmed Nuur Cismaan Xaaji ayaa sheegay in Ayaxa uu saameyn ku yeeshay beeraleyda ku nool deegaannada Galmudug, isla markaana ay sameeyeen kooxo la dagaalamaya Ayaxa iyo kuwa qiimeyn ku sameynaya meelaha ugu badan ee uu Ayaxa ku habsaday.
Wasiirka oo la hadlay Radio Muqdisho ayaa sheegay inay socdaan xog uruurin iyo sahan ay ku sameynayaan deegaannada dhul beereedka ee uu Ayaxu baabi’iyay, waxaana qorsheyneynaa inaan bulshada u soo bandhigno xogta oo dhameystiran iyo qasaaraha uu Ayaxu geystay.
“Safaradeena waxa ay ku wajahanyihiin u kuurgelidda iyo goobaha saxda ah ee Ayaxa u badanyahay, anagoo raadinayna xaqiiqda dhabta ah qasaaraha uu Ayaxa u geystay beeraleyda, waxaana safari cir iyo dhul ah ku tegay Gaalkacyo, Xeraale, Cadaado iyo Caabudwaaq oo aan kulamo la qaatay qeybaha bulshada, anagoo adeegsaneyna diyaaradaha qumaatiga u kaca” ayuu yiri mudane Axmed Nuur.
Wasiirka Beeraha iyo Waraabka ee Galmudug ayaa tilmaamay in howshan ay Wasaaradda ka saacideyso hay’adda beeraha iyo cunada u qaabilsan Qaramada Midoobay ee FAO.
Mudane Axmed Nuur Cismaan Xaaji ayaa ugu baaqay in hay’adaha samafallka ay gurmad la gaaraan dadka beerahooda uu ka baabi’iyay Ayaxa ku habsaday deegaannada Galmudug.
