Wasiirka Caafimaadka ee xukuumadda Soomaaliya Xaawo Xasan Maxamed, Wasiir ku-xigeenka Wasaarada caafimaadka Cismaan Daallo, Guddoomiyaha Guddiga adeega bulshada ee baarlamaanka Xildhibaan Cismaan Maxamuud Dufle oo ay wehliyaan mas’uuliyiin kale oo ka tirsan Wasaaradda Caafimaadka ayaa maanta waxa ay booqdeen Wasiirkii hore ee Wasaaradda Caafimaadka Dr Aadan Xaaji Ibraahim oo ku xanuunsanaya Isbitaalka Digfeer ee magaalada Muqdisho.
Wasiirka caafimaadka iyo mas’uuliyiintii la socotay waxa ay xogwareysi ku aadan xaalada caafimaad ee Wasiirkii hore caafimaadka la yeesheen ehelada iyo dhaqatiirta isbitaalka.
Xaawo Xasan Maxamed Wasiirka caafimaadka ee Xukumadda Federaalka ah ee Soomaaliya oo intaas kadib la hadashay Warbaahinta Qaranka ayaa sheegtay in Wasaaradda caafimaadku ay ku dadaaleyso sidii caafimaad dibadda ah loogu qaadi lahaa Aadan Xaaji Ibraahim, haddii xaaladiisa caafimaad wax looga qaban waayo gudaha dalka.
Dr Aadan Xaaji Ibraahim Wasiirkii hore ee Wasaaradda Caafimaadka oo ka mid ahaa dowladii KMG ahaa ee dalka soo maray waxa uu muddooyinkan ka xanuunsanayay Muqdisho, iyadoo dowlada ay iminka dadaallo ugu jirto sidii u heli lahaa adeeg caafimaad oo dibadda ah.
