Wasiirka Caafimaadka ee xukuumadda Soomaaliya oo uu wehlinayo Wasiir ku-xigeenka caafimaadka ayaa maanta kormeeray isbitaalka Madiina, gaar ahaan qeybta saalada oo dhawaan dab qabsaday, iyagoo u kuurgalayay dabka qabsaday saalada qasaaraha uu gaarsiiyay.
Dr Maxamed Yuusuf Agaasimaha Isbitaalka ayaa mas’uuliyiintan ku soo wareejiyay qeybaha isbitaalka, gaar ahaan qeybta saalada ee uu dabka qabsaday iyo qasaaraha ka dhashay, oo ay ka mid ahaayeen agabyadii gurmadka deg deg ah iyo kuwa qaliinka lagu sameyn jiray oo bas beelay, iyagoo sidoo kale kormeer ku sameeyey agabyo si KMG ah qaliino lagu sameeynayo oo ay Wasaaradda caafimaadka halkaasi geystay dabka kadib.
Agaasimaha Isbitaalka Dr Maxamed Yuusuf ayaa intaas kadib ka warbixiyay qasaarihii ka dhahay dabkii qabsaday qeybta saalada ee isbitaalka iyo kaalmadii ay Wasaaraddu gaarsiisay waxa ay ka badashay baahiyaha qaliin ee isbitaalka ka jirtay.
“Waan ku faraxsanahay in Wasaaraddu ay gacan weyn naga siiso, dhibtii uu gaarsiiyay goobihii ugu muhimsanaa ee isbitaalka oo dabqabsaday, taas badalkeedana ay Wasaaraddu na soo gaarsiisay qalab aan isticmalno iyo dhismihii saalada oo dhawaan ay noo dhagax dhigtay Wasiirka Caafimaadka” ayuu yiri Agaasimaha isbitaalka
Wasiirka Caafimaadka ee Xukuumadda Soomaaliya Drs Xaawo Xasan Maxamed ayaa sheegtay in isbitaalka uu yahay mid muhiim u ah dadweynaha Soomaaliyeed oo u qabta adeegyo kala duwan, Wasaaradduna ay ka qeyb qaadaneyso sidii markale isbitaalka uu u sii wadan lahaa adeegyada uu u hayo bulshada Soomaaliyeed.
“Shaqo muhiim ah ayuu u hayaa isbitaalka bulshaada Soomaaliyeed, anaguna sharaf ayay inoo tahay inaan gacan ka geysano inaysan hakad gelin howlaha isbitaalka ugu gurmanayo shacabka, waxaan gacan ka geysan doonaa dib u dhiska qeybta saalada ee isbitaalka” ayay tiri Drs Xaawo Wasiirka Caafimaadka.
Sawir qaade:- Sugaal Macalin Maxamuud
