Wasiirka caafimaadka ee Xukuumadda Soomaaliya Drs Xaawo Xasan Maxamed ayaa maanta qalab caafiamaad oo hal konteenar ah ka guddoontay ururka Soomaalida ee dalka Finland’ “Somali Finland Association” kaasi oo loogu talagalay in la gaarsiiyo xarumaha caafimaadka ee gobollada dalka.
Drs Xaawo Xasan Maxamed Wasiirka caafimaadka oo shir jaraa’id ku qabatay xafiiskeeda ayaa ugu horeyn mahadcelin u jeedisay ururka Soomaalida ee dalka Finland, sida ay u garteen inay qalab caafimaad soo gaarsiiyaan bulshadooda, waxaana ay intaa ku dartay in deeqdan waxbadan ka badali karto horumarka dalka.
“Haddii wax la wada qabto wax badan ayay ka badali kartaa horumarka dalka, runtii waxaan idin leenahay mahadsanidiin, sida aad u garateen in bulshadiina aad gurmad soo gaarsiisaan, jaaliyadaha kale waxaan ka codsaneynaa in gurmad sidan oo kale ay dalka soo gaarsiiyaan” ayay tiri Drs Xaawo Xasan Maxamed.
Wasiirka caafimaadka ee Xukuumadda Soomaaliya ayaa hoosta ka xariiqday in qalabka la gaarsiin doono xarumaha caafimaadka ee Gobollada dalka, si loogu adeego shacabka, waxaana ay si gaar ah ugu mahadcelisay Hay’ad Qaramada Midobay ee UNFPA oo gacan ka geysatay keenista qalabka caafimaadka ah ee ay soo dhiibeen Ururka Soomaalida Finland.
