Wasiirka Wasaaradda Caafimaadka iyo Daryeelka Bulshada Xukuumadda Federaalka Soomaaliya Dr Cali Xaaji Aadan oo Xafiiska Ku qaabiley Wafdi ka socotey International Medical Crops (IMC).
Kulanka waxaa qeyb ka ahaa Wasiiru dowlaha Wasaaradda Caafimaadka Dr Maryama Maxamed Xuseen, Agaasimaha guud ee Wasaaradda Mr Axmed Yuusuf Cabdulle iyo qaar ka mid ah howl wadeenada Wasaaradda Caafimaadka iyo daryeelka bulshada xukuumadda Federaalka Soomaaliya.
Wafdiga ka socdey IMC oo uu hoggaaminayey Ronald-Paul Veilleux Wakiilka IMC ee Soomaaliya, ayaa warbixino ku saabsan wadashaqeynta kala dhaxeysa Wasaaradda u gudbiyey Wasiirka Wasaaradda Caafimaadka iyo Daryeelka Bulshada Xukuumadda Federaalka Soomaaliya Dr Cali Xaaji Aadan iyo kaalinka ay ku leeyihiin horumarinta qeybta Caafimaadka Soomaaliya.
Madaxda hey’adda, ayaa boggaadisey in Wasiirku gartey doorka ay ku leeyihiin Horumarinta Caafimaadka oo markasta ay qeyb wayn ka yihiin, waxa ayna faahfaahin buuxda ka bixiyeen howlaha ay gacanta ka geystaan ee la xiriira qeybta Bani’aadannimada iyo Horumarinta Caafimaadka.
Madaxda ka socotey Hey’adda IMC, ayaa sidoo kale xustey in ay gacan ka geysan doonaan Barnaamijka xirmooyinka Caafimaadka maadaama Bulshadeena u baahan tahay adeeg Caafimaad oo buuxa si loo hello Barnaamijka xalka waara ee qeybta Caafimaadka iyo Daryeelka Bulshada Soomaaliyeed.
IMC ayaa qeyb ka ah hey’addaha taageera Mashaariicda Caafimaadka gaar ahaan dhinaca gargaarka Caafimaadka ee Goboladda Dalka, iyagoona xusey xoojinta howlaha ay ka hayaan qeybaha Caafimaadka dalka iyo in la dardargaliyo Mashaariicda cusub ee qorshuhu yahay in laga hirgaliyo dhamaan Gobolada Dalka.
Ka hor inta aan la soo gabagabeyn kulanka ayaa labada dhinac waxa ay isla garteen in dib loo cusboonaysiiyo heshiiska iskaashiga iyo sidoo kale in la xoojiyo adeegyada laga fulinaya deegaanada ay baahida Caafimaad ka jirto, iyo in loo gudbo meelaha ay adag tahay in lagaarsiiyo taageerada Barnaamijyada Caafimaad ee luugu talagaley dadka qaba baahiyaha Caafimaad.
Wasiirka Wasaaradda Caafimaadka iyo Daryeelka Bulshada Xukuumadda Federaalka Soomaaliya Dr Cali Xaaji Aadan ayaa ugu dambeyn Madaxda IMC kala hadley xoojinta Mashaariicda ay bixiyaan iyo in la dardar galiyo wadashaqeynta kala dhaxeysa Wasaaradda si loo Horumariyo qeybta Caafimaadka Dalka iyo in ay ka qeyb qaataan gurmadka Caafimaad iyo kan nolaleed ee loo baahan yahay in la gaarsiiyo dadka.
