Xaflad si heersare loo soo agaasimay ayna ka qeybhaleen Ururada Haweenka, Dhallinyarada, Midowga Jaamacadaha, Wasiirka Dhallinyarada iyo Xildhibaanno oo lagu xusaayey Aas aaskii Ururka Himilo oo ka mid ah Ururada ka howlgala Dalka ayaa lagu qabtay magaalada Muqdisho.
Ugu horeyn waxaa xafladda furey Guddoomiyaha Ururka Mudane Asad Maxamed Maxamud (Asad Dheere) oo soo dhaweyn u sameyey dhamaan dadka ka soo qeybgalay xafladda ayaa faah faahin ka bixiyey Ururka iyo sababaha loo aas aasey wuxuuna Sheegay ”Waxaa aas aasey Ururkan Himilo dhallinyaro aqoonyahanno ah oo kasoo laabtey Dalka dibadiisa oo wax kusoo bartey hadafkooduna yahay sidii ay u horumarin lahaayeen bulshada Soomaliyeed gaar ahaan bahda dhallinyarada iyo sidii wax loogu badali lahaa”.
Xadladda intii ay socotay ayaa ka qeybgalayaasha waxaa loo soo bandhigay Waxqabadka Ururka Himilo muddadii sanadka aheyd uu jiray, waxayna si weyn ula dhaceen wax qabadka Ururka oo ay ku tilmaameen in ay qabteen howl muhiim ah oo Bulshada ku nool magaalada Muqdisho.
Cayaaraha Hiddaha iyo dhaqanka Soomaaliyeed ayaa lagu soo bandhigay xafladda intii ay socotay, iyadoo kooxda fanka Ururka ay soo jeediyeen Heeso Waddani ah, dhaanto iyo Cayaarta Saylici, taasi oo soo jiidatay ka soo qeybgalayaashii xafladda.
Wasiirka Dhallinyarada iyo Cayaaraha xukuumadda Federaalka Soomaaliya Maxamed Cabdullaahi Xasan (Nuux) oo ka hadlay xafladda sanad guuradda Ururka Himilo ayaa sheegay in uu aad ugu faraxsanyahay ka soo qeybgalka xaflada,
”Wasaaradda waxa ay soo dhaweyneysaa Ururada sidaan oo kale u shaqeeya, waxaan ku howlanahay sidii loo sameynlahaa siyaasadda lagu dhaqayo dhallinyarada, waxaa horumarin ku sameyn doonaa cayaaraha dalka si looga baxo dhibaatooyinka ku xeeran, waxaan markale soo dhaweynayaa sanad guuradda Ururka Himilo, waxaana u rajeynayaa in uu wax badan u qabto shacabka Soomaaliyeed”. ayuu yiri Wasiir Nuux.
Ugu dambeyntii waxaa shahaado sharaf la guddoonsiiyey qaar ka tirsan Ururka Himilo oo sameeyey dadaal iyo howlkarnimo sanadkii la soo dhaafay.
Cabdiraxmaan Black
