Ciidamada Xoogga dalka iyo kuwa dowlad Goboleedyada ayaa kordhiyay howlgalada looga xureynayo maleeshiyaadka Alshabaab deegaanada ay kaga sugan yihiin Gobolada dalka.
Wasiirka Gaashaandhiga XFS mudane Xassan Cali Maxamed (Amardambe) oo la hadlay Warbaahinta Qaranka ayaa sheegay in Alshabaab uu waqtigoodi dhamaaday, isla markaana Ciidamada Qalabka sida ay wadaan howlgallo argagixisada looga ciribtiraayo guud ahaan dalka.
Wasiir Amardambe ayaa sidoo kale xusay in uu weli furanyahay Cafiska Madaxweynaha Jamhuuriyadda Federaalka Soomaaliya mudane, Maxamed Cabdullaahi Farmaajo uu u fidiyay dhallinyarada ay marin habaabiyeen maleeshiyaadka Arxanlaawayaasha Alshabaab, wuxuuna ugu baaqay dhallinyarada la qalday in ay isku soo dhiibaan Ciidamada ammaanka ka hor inta aan dagaal lagu soo qaban.
Hadalka Wasiirka Gaashaandhiga ayaa imaanaya iyadoo billiihi u dambeeyay aragagixisadu ay weerarro kala kulmayeen Ciidamada Xoogga dalka, kuwa Daraawiishta dowlad Goboleedyada iyo dadka Shacabka ah oo ka biya diiday in ay bixiyaan lacago baad ah.
