Wasiirka Wasaaradda Gaashaandhigga ee Xukuumadda Federaalka Soomaaliya, Mudane Axmed Macallin Fiqi, ayaa maanta kormeer ku tegay xarunta dhexe ee Hay’adda Maareynta Musiibooyinka Qaranka (SoDMA). Wasiirka waxaa kormeerkiisa ku wehliyay saraakiil sare oo ka tirsan Ciidanka Xoogga Dalka Soomaaliyeed (CXDS), waxaana halkaas si diirran ugu soo dhoweeyey Guddoomiyaha SoDMA, Mudane Maxamuud Macallin Cabdulle iyo masuuliyiin kale oo sar-sare oo ka tirsan hay’adda.
Kulanka ay yeesheen labada dhinac ayaa diiradda lagu saaray xaaladdaha deg-degga ah ee ka dhalatay roobabka Gu’ga ee ka da’ay qaybo badan oo dalka ka mid ah, saameynta ay yeesheen iyo diyaarinta qorsheyaal wax ku ool ah oo lagu caawinayo dadka ay saameeyeen daadadka iyo fatahaadaha.
Guddoomiye Maxamuud Macallin ayaa Wasiirka la wadaagay warbixin kooban oo ku saabsan xaaladda beni’aadannimo ee hadda jirta, saadaasha cimilada, iyo heerarka biyaha wabiyada dalka, iyadoo laga duulayo baahida loo qabo in la is waafajiyo gurmadka beni’aadannimo iyo howlgallada milatari ee socda si dalka looga xoreeyo Khawaariijta.
Sidoo kale, kulanka waxaa lagu lafa-guray sidii gargaar deg-deg ah loo gaarsiin lahaa deegaannada laga xoreynayo Khawaariijta iyo sidii shacabka halkaas ku dhaqan loogu fidin lahaa taageero beni’aadannimo oo degdeg ah, si loo xoojiyo xasilooonida.
Wasiirka Gaashaandhigga Xukuumadda Federaalka Soomaaliya Mudane Axmed Macallin Fiqi, ayaa ammaanay shaqada adag ee ay Hay’adda SoDMA u hayso shacabka Soomaaliyeed, isagoo xusay in doorkooda uu yahay mid muhiim u ah samata bixinta bulshada. Wuxuu hay’adda ku dhiirrigeliyay in ay sii laba laabaan dadaallada gurmadka ah, si gaar ahna loo daryeelo dadka nugul ee ay saameeyeen musiibooyinka dabiiciga ah iyo colaadaha.
