Wasiirka cusub ee Wasaaradda Gargaarka iyo maareynta masiibooyinka Soomaaliya Marwo Khadiijo Maxamed Diiriye ayaa kulan looga hadlayay dardar gelinta shaqada Wasaaradda la qaadatay shaqaalaha iyo masuuliyiinta Wasaaradda Gargaarka iyo maareynta masiibooyinka.
Kulanka ayaa inta uu socday waxaa diirada lagu saaray fulinta qorshe howleedka billaha soo socda ee Wasaaradda u yaala, kullanka ayaa ahaa kii u horreyay tan iyo markii ay xilka la wareegtay Wasiir Khadiijo Maxamed Diiriye.
Wasiirka oo ka hadashay kulanka ayaa sheegtay in ujeedka kulanka uu yahay qaabka horay loogu sii socon lahaa oo loo dardar gelin lahaa waajibaadka Wasaaradda.
“ Waxaan ka wada hadleynay qaabkii horay loogu sii socon lahaa, loo dardar gelin lahaa waajibaadka na saaran oo ay ugu horeyso inaan raacno faritaanka Ra’iisal wasaare Rooble oo ah qorshe howleedka barnaamijkiisa xukuumadda oo ah sagaashanka cisho ee ugu horeeyo iney Wasaaradda soo bandhigto barnaamijkeeda hor tebinta leh,” ayay tiri Wasiir Khadiijo oo kulanka ka hadashay.
Kulanka ka dib, Wasiirka Wasaaradda Gargaarka iyo masiibooyinka Qaranka Marwo Khadiijo Maxamed Diiriye ayaa kormeer ku sameysay waaxda wargelinta xaaladaha deg dega ah, halkaas oo ay warbixin kaga dhageysatay shaqaalaha xarunta.
Kullankan waxaa goobjoog ka ahaa Wasiir ku-xigeenka Wasaaradda, Agaasimaha Guud iyo madax qeybeedyada Wasaaradda.
