Wasaarada Haweenka iyo Xuquuqul Insaanka dowladda Soomaaliya ayaa sheegtey in ay ku howlantahay sidii dastuurka dalka loogu dar dargelin lahaa in haweenka ay helaan xuquuqda ay ku leeyihiin hay’adaha dowladda.
Marwo Sahro Maxamed Cali Samatar Wasiirka Haweenka oo la hadashay Radio Muqdisho ayaa tilmaamtay in Wasaaraddu ay xoogga saari doonto sidii haweenka ay door muuqda ugu yeelan lahaayeen hay’adaha kala duwan ee dowladda, ayna u helaan xuquuqda ay dowladda ku leeyihiin.
“Waxaa hadda aad ugu faraxsanahay inuu gabo gabo ay noo mareyo hindise sharciyeedkii ku saabsan ka hortagga xadgudubka dumarka, isla markaana ay dadaal ugu jirno sidii haweenku ay ku heli lahaayeen kaalintii ay ku lahaayeen siyaasadda dalka, marka hadii arrintaasi ay noo soo gabo gabowdo waxay haweenku u sahli kartaa in 30% ay dowladda ka helaan xaquuqdii ay ku lahaayeen, dastuurka dalkana wax laga badalo oo la balaariyo doorka haweenka ay ku leeyihiin dalka”ayay tiri Sahro Maxamed.
Wasiirka Haweenka iyo xuquuqda aadanaha ayaa xustay in ay ku howlanyihiin sidii shaqo abuur loogu sameyn lahaa haweenka Soomaaliyeed, ayna u heli lahaayeen tababaro sare loogu qaadayo xirfadooda.
